РФ-дин Госдумади и йисан июндиз кардик акатдай важиблу къанунрикай, къайдайрикай малуматар раижнава. Абур гзаф россиявийриз талукьбур я.

ИкI, 1-июндилай яшамиш хьунин агъа кIанин такьат­рин кьадар ва кIвалах тийизвай пенсионеррин пенсия 10 процентдин артух жеда.

РФ-дин субъектрин регьберриз официальнидаказ губернатор ва я региондин кьил лугьуда. Регионрин кьилериз къуллугъдал кьве муддатдилайни артух галаз-галаз кIвалахдай ихтияр ава. Губернатордин ва региондин кьилин къуллугъдин са муддат 5 йис  жеда.

Россияда “килигзавайдан паспорт” (“паспорт болельщика”) пайда жеда. Спортдин мярекатрин билетар и паспорт гвайбуруз гуда. Мярекатрин, акъажунрин сиягь гьукуматди тайинарда. ТIвар кьунвай документ “Госуслуги” порталдин куьмекдалди туькIуьриз жеда. Эгер, спортдин мярекатриз, акъажунриз килигдайла, къайдаяр чIурай дуьшуьшар малум ятIа, ахьтин касдиз махсус документ гудач.

Яракьрин гьакъиндай

Гьукумдарри яракьар ишлемишунин месэладиз талукь гуьзчивал мягькемарда. Къанунда тестикьарна­вайвал, яракь хаталу я. Гъуьрчен яракь, гуьлле гу­дай­ цIалцIам ва яргъи луьледин яракь гила 21 йис тамам хьайидалай кьулухъ къачуз жеда. Идалай фад къачудай ихтияр армияда къуллугъ авур РФ-дин ватандашриз, гьакIни государстводин военный тешкилатра къуллугъзавайбуруз, аскервилин тIвар (чин) ва я юстициядин классдин чинар авайбуруз ава.

Яракь хуьнин жигьетдайни бязи къадагъаяр кардик кутунва. Яракь масакIа туькIуьр хъувун, СМИ-ра, хабарринни телекоммуникацийрин сетра къанунсуздаказ яракьар гьазурунин ва я масакIа туькIуьр хъувунин малуматар раижун къадагъа я.

Гьазурайди — Камилла Мегьдиханова