Советрин девирда Украина бегьерлу, берекатлу чилерал зегьмет чIугвадай ашкъи авай халкьар яшамиш жезвай, гьукуматдин чIехи орденриз, гъиляй-гъилиз къведай Яру пайдахдиз лайихлу, гьуьрмет, тIвар-ван авай, мублагь, девлетлу, гъуд хьиз тIарам уьлкве тир. ГьикI хьи, са рикI, са чан тир Урусатдихъ галаз. Гъил-гъиле кьуна, стхавилин инанмишвал авай. ГъвечIи-чIехидаз чпин буржи чизвай. Зегьметдиз кутугай къимет гузвай. Везифа-мурад сад тир: руьгьдай са нефесдал хьун. Нефсинал, фитнедал, мецел тIапIар алай. Къадир авай кьилел алай бапIахдин.
Къвез фена вахтар. Кьилер — дегиш, ахтармишунар къуьруь хьана. Фитнечи, чапхунчи мецери фурсатдикай менфят къачуна: кьил хкажна, мециз кьезилбур руьгьдай хъуьтуьларна. Инсанвал, керчеквал, гьуьрмет-хатурни гару тухвайди хьиз, фена. Гьайиф! Са бедендикай нек хъвайи балаяр гьарма сад вич-вичиз хьана. Гьар сад, хуруз гъуд ягъиз, “зун-зун” лугьуз, гара ава. Тек тар тама тахьуй лугьуда. Яраб ахьтин “гьунар” гьинал кьван ятIа?
Къе ашкара я: авач даях, амач дамах. Украинадин президент В.Зеленский, вуч ийидатIа тийижиз, кьил кьуна ава. Чинеругдин къармахра гьатнавай нуькI хьиз, Америкадин буржара акIанва. Гайи яракьар-куьмекар бадгьава фидайди туш гьа. Гьадай техил чIугвазва Америкадиз. Чухвазва Украина. РикIи гьикI эхзаватIа?! Зеленскийдай финдикь акъатзавач: буржлуни я, кичIени, руьгьдай табий хьанва. Аялди хьиз, кьил лап Байденан хъуьчIуьк кутунва. Алат хьиз ишлемишиз тазва вич — футфа кутаз, гьалдариз. КьатIунзавач гьар са рикIе са сикI авайди. Америкади вичел кап эцигзавайди. Хиялдай фенвай хьтинди я вични президент — регьбер тирди, халкьдин вил вичел, вичин гафунал алайди. Авач аннамишун. ИкIни жеда кьван! Я адаз са дуьз меслят гудай садни авайди хьиз аквадач. Гьа меслятни гьикI гурай, ам, келче хьиз, кьил атIумарна акъвазнавайла, хьайитIа, Байденакай жеда лугьуз. Гьеле гьадавай генани гужлу яракьар тIалабзава, Россиядиз гьелягьар кьазва. Чпин халкь гьелек хьунал, кашал къведайди аквазвач. Яраб ихьтин къадирсузвилин атIа кьил квел къведатIа, буржар гьикI вахкудайди ятIа? Хъсан я гьа са техилдалди алатиз хьайитIа. Темягьар ахъа хьана, Украинадал капни эцигайтIа гуж хьана. Мумкинни я, тIуб юзурнава эхир…
Яраб акьван ивияр экъичнавай, акьван дидейрин накъвар кужумнавай, акьван агь-къаргъиш галай чиляй къачур техил гьалал, иливариз жеда жал чапхунчи нефсеривай?!
Гьайиф, гьайиф, ахьтин мублагь Украина икI виляй аватиз…
Нурудин Насруллаев
