Сад лагьай актриса. Дагъустандай тир кинодин сад лагьай актриса Сафият Аскарова 1907-йисуз Ахцегьа дидедиз хьана. Сад лагьай сеферда ам 1914-йисуз вичин хайи хуьруьн театрдин сегьнедал экъечlна. Сифте яз “Под властью адата” кинода 1925-йисуз къугъвана. “Мосфильм” киностудияда кlвалахна ва маса гзаф кинойра къугъун агалкьунралди давамарна. 1955-йисуз ам залан азардикди кечмиш хьана. Москвада кучукнава.
“Асари-Дагъустан” ктаб — тlвар-ван авай лезги алим-тарихчи ва философ Алкьвадар Гьасан эфендидин (1834-1910), машгьур шейх Мегьамед Ярагъвидин хтулдин зегьмет. А ктабда сифте яз Рагъэкъечlдай патан Кавказдин (Дагъустандин) халкьарин тарихдикай (арабар атай ва ХIХ асирдин эхирдал кьван девирдин) делилар гьатнава.
Кьакьан чарчар. Чадавур — Докъузпара районда авай, Чlехичай вацlун са хел тир Чадавур тlвар алай вацlун чарчар. Чадавур Дагъустан Республикада виридалайни кьакьан чарчар я.
Лезги устlарар. Лезгийри Кцlар райондин Хьилер, Мирал, Юкьван Ярагъ хуьрерин устlарри туькlуьрнавай кlарасдин затlарикай гегьеншдаказ менфят къачузвай. Хъенчlин къапар гьазурунин асул чкаяр Мичегь, Испик ва Еникент хуьрер хьана. Куьснет, Тlигьир, Имамгъулукент ва Гымыл хуьрерин чатухъанарни машгьур тир, халкьдин арада абуруз гьуьрмет авай.
Гьазурайди — Куругъли Ферзалиев
