Вич шаир, артист тушиз, Кьулан СтIалрин юкьван школадин муаллимвиле кIвалахиз, районда яшамиш жезвай гзаф кьадар инсанриз чизвай, абурун патай гьуьрмет къазанмишнавай маса кас СтIал Сулейманан районда, заз чиз, мад авач. Кьулан СтIалрин юкьван школадин ОБЖ-дин муаллим Халилбегов Халилбег Жарулаевича 2009-йисалай райондин профсоюзрин тешкилатрин координациядин советдин председателдин везифаярни тамамарзава.
Мартдин вацран эхиррай Дагъустан Республикадин Кьил Сергей Меликован къарардалди Халилбег муаллимдиз “Дагъустан Республикадин лайихлу муаллим” тIвар ганвай шад хабар агакьна.
Халилбег 1958-йисан 21-октябрдиз Векьелрин хуьре дидедиз хьана. Дидедини бубади колхозда кIвалахзавай. 1961-йисуз Векьелар Кьулан СтIалдал куьч хьана. 1977-йисуз хуьруьн школа куьтягьна, Халилбег Дагъустандин университетдин филологиядин факультетдиз гьахьна. 1982-йисуз вуз куьтягьайла, кIвалахиз Агъул райондин РичIарин хуьруьз ракъурна. Ана адакай урус чIаланни литературадин муаллим хьана. 1985-йисан сентябрдилай СтIал Сулейманан райондин КIварчагърин юкьван школада зегьмет чIугуна. 1986-йисалай Кьулан СтIалрин юкьван школада кIвалахзава.
Халилбег Жарулаевича гьазурнавай аялрин командади 2019-йисуз районда хьайи военно-спортивный “Гъалибвал” ва “Жергеда акъвазайтIа жеда” къугъунра — 1, 2009-йисуз республикада кьиле фейи военно-спортивной “Зарница” къугъуна — 2, 2010-йисуз армиядин жергейриз эвер гудай яшдив агакь тавунвай жегьилрин арада кьиле тухвай республикадин спартакиадада 3-чкаяр кьуна. Идалайни гъейри, абур 2012-йисуз “Президентдин акъажунра” 2-чкадиз лайихлу хьана.
Халилбег муаллим Вирироссиядин “Юнармия” гьерекатдин райондин штабдин, ОБЖ-дин методикадин курсарин руководитель я. Кьулан СтIалрин жемятди ам хуьруьн депутатвилени хкяна.
1999-йисуз Дагъустандал бандтешкилатри вегьейла, Халилбег муаллимди хайи макан душманрикай хуьн патал хуьруьнвийрикай ополченцияр кIватIна ва, вич командир яз, гъвечIи десте арадал гъана. А чIавуз адаз гьукуматдин патай “Россиядин ватанперес” медаль ганай.
Х.Халилбегован гьакъисагъ зегьмет профсоюздин тешкилатрин патай ганвай са кьадар грамотайралди, медалралди, маса пишкешралди къейднава. Ам “РД-дин халкьдин образованидин отличник” ва “РФ-дин образованидин гьуьрметлу работник” лагьай тIварарин сагьиб я.
Школада кIелзавай аялрин куьмекдалди Халилбег муаллимди военно-спортивный городок, ОБЖ-дин кабинет, “Россиядин Игит Р.А.Халикьован тIварунихъ галай женгинин ва зегьметдин баркалладин музей” туькIуьрнава. Р.Халикьов Кьулан СтIалрин юкьван школадин выпускник тир. Винидихъ къалурнавай кIвалахар ийидайла, пулдин куьмек Абдулвагьид Жавадова ва Россиядин Игитдин хизанди ганай.
Халилбег муаллим хъсан суьгьбетчи я. Адаз хайи халкьдин тарихни хъсандиз чида. Школада кIелзавай аялриз, ярар-дустариз лезги халкьдин ивиррикай ихтилатар ийида. Инсанрихъ галаз ада хушдаказ рафтарвалда, алакъаяр хуьда.
Кьулан СтIалрин хуьре яшамиш жезвай Халилбеговрин хизанди, са гектарни зур чил къачуна, ана шуьмягърин багъ кутунва, рикI алаз адахъ гелкъвезва. Ана ярар-дустар галаз ял ядай шартIарни тешкилнава. Халилбег муаллимдинни адан уьмуьрдин юлдаш ФатIиматан хизанда пуд гадани са руш тербияламишзава.
Масуб Магьмудов
