СтIал Сулейманан райондин пресс-къуллугъди хабар гузвайвал, и мукьвара ЦIийихуьруьн юкьван школада “Президентдин акъажунар” тIвар алаз кьиле тухузвай Вирироссиядин акъажунрин муниципальный пай кьиле фена. Райондин администрациядин спортдин, туризмдин ва жегьилрин крарин рекьяй комитетдин куьмекни галаз РУО-ди тешкилнавай серенжемда райондин жуьреба-жуьре мектебрин 7-классра кIелзавай аялрин 13 командади иштиракна.
И серенжемдин макьсад школайра кIелзавай аялрин сагъламвал мягькемарун, абур физкультурадал ва спортдал желб авун я. Ам ачухай ва кьиле тухвай ЦIийихуьруьн СОШ-дин физический культурадин муаллим Керим Бабаева акъажунра иштиракзавай аялрихъ агалкьунар хьана кIанивилин келимаяр лагьана ва абур кьиле тухунин къайдадихъ галаз танишарна.
Акъажунрин программадик спортдин многоборьедай устадвал къалурун, чукурунай эстафета, яратмишунрин ва теориядин конкурсар квай. Къизгъиндаказ кьиле фейи акъажунрин нетижада КIварчагърин юкьван мектебда 7-классда кIелзавай аялрин команда 1-чкадиз лайихлу хьана. Курхуьруьн ва ЦIийихуьруьн мектебрин аялрин командайри — 2, Кьулан СтIалрин ва Эминхуьруьн мектебрин командайрини 3-чкаяр кьуна.
Гъалибчи ва приздин чкаяр кьур командайриз СтIал Сулейманан райондин образованидин управлениди грамотаяр ва къиметлу пишкешар гана. КIварчагърин хуьруьн юкьван мектебдин аялри гила Вирироссиядин акъажунрин республикадин паюна чпин устадвал къалурда.
Р.Рамалданова
