“Дагъустандин дишегьли” журналдин алай йисан 2-нумра чапдай акъатнава. Гьелбетда, журнал дишегьлийринди я, адан чинриз акъудзавай макъалаяр, зарисовкаяр, очеркарни чи баркаллу ва гуьзел таватрикай я. 8-Мартдин сувар фикирда аваз гьазурнавай нумрада Дагъларин уьлкведин са шумуд халкьдин векилрикай, жуьреба-жуьре хилера еке агалкьунар къазанмишнавай дидейрикай, вахарикай, сусарикай, рушарикай кхьенва. Чаз абур кIан я, абурун крарилай, къилихрилай, гьиссерилай, уьмуьрдив эгечIзавай тегьердилай чна разивалзава, абуруз рикIин сидкьидай гьуьрметзава.
Дишегьлийрилай пара крар аслу я. Эгер кIвале намуслу, зегьметдал рикI алай, гьар са килфетдин къайгъуда авай дишегьли хьайитIа, хизандин багъди цуьк акъудда ва тарифлу бегьерарни гуда. Гьавиляй чна гьар са камуна чи дишегьлийрин крарал, алакьунрал, къимет авачир хьтин зегьметдин нетижайрал дамахзава.
Ахьтинбурун жергеда яргъал йисара республикадин диагностикадин центрадин лабораториядин заведующийвиле кIвалахай Ткезбан Эседовани, Вирироссиядин “Россиядин дидеяр” общественный гьерекатдин Дагъустандин отделенидин председатель, РД-дин дишегьлийрин Союздин президиумдин, Дагъустандин аскеррин дидейрин комитетдин член Таиса Мегьамедовани, Дагъустандин дизайнер, международный дизайнеррин лигадин член, “Лезги гам” проектдин автор Каринэ Рамазановани, Харбукдай тир чатун устIар, сеняткар, гуьрчег гапуррин ва маса безекрин устад Жевгьер Мегьамедкьадиевани, Хучнидай тир гамарин устIар, СССР-дин Верховный Советдин депутат хьайи Угълангерек Абдулкеримовани, Урухсота хуьряй тир чIехи хизандин кайвани, шаир ТIагьират Жаватхановани, Къумукьрин А.Салаватован тIварунихъ галай госмуздрамтеатрдин актриса Зуьгьре Асельдеровани ава.
Нумрада гьакI Фазу Алиевадин “Ви езнедиз гъуьлуьз физва” новелла, Нариман Ибрагьимован “Чи Игит диде” поэмадай чIук, Наира Шихнабиевадин “динг” гафунин мана ачухарзавай макъала, дишегьлийриз кIвалин майишатда герек къведай жуьреба-жуьре меслятарни ганва.
Абад Азадов
