Россиядин вири регионрин 16 йисалай виниз яшар хьанвай агьалийривай ИТ-пешейрай пулунин жигьетдай 50, 75 ва я 100 процентдин кьезилвал аваз чирвилер къачуз жеда. Ихьтин мумкинвал государстводи милли “Рекъемрин экономика” проектдин ужунда гузва.
Программада иштиракдай вирибуруз талукь умуми истемишунрик акатзава:
— иштиракзавайди РФ-дин ватандаш хьун;
— юкьван пешекарвилин, кьилин образование аваз хьун;
— студентар;
— кьезилвилер талукь дережайрикай сад аваз хьун: инвалидар, бейкарар, 3 йис тахьанвай аялар галайбур, студентар, бюджетникар, тIимил къазанжи авай ксар.
Кьилди къачуртIа, 100 процентдин кьезилвал инвалидвал авайбуруз ва кIвалахдик квачир, кардал машгъулардай центрадин учетда авай ксариз талукь я.
75 процентдин кьезилвал талукь я:
— региондин юкьван гьисабдиндалай тIимил мажиб авай, 3 йисан яшдив агакь тавунвай аялар авай диде-бубайриз;
— кардал машгъулардай центрада учетда авачир бейкарриз.
50 процентдин кьезивал талукь я:
— региондин юкьван гьисабдиндалай артух мажиб авай, 3 йисан яшдив агакь тавунвай аялар авай диде-бубайриз;
— бюджетдин тешкилатрин къуллугъчийриз;
— студентриз;
— региондин юкьван гьисабдиндалай тIимил къазанжи къвезвайбуруз.
Программада иштиракдайбурувай “разработчик приложений”, “продуктовый и системный аналитик”, “бизнес-архитектор”, “интернет-маркетолог”, “веб-дизайнер”, “ИТ-рекрутер”, “специалист по e-commerce и CRM-менеджменту” пешеяр къачуз жеда.
Къейд ийин, чирвилер гунин кар онлайн къайдада тешкилзава. Тарсарин кьадар академический 250 сят ва я адалай артух жеда. Эхирдай выпускникриз пешедин рекьяй дипломар гузва.
Программада иштиракуникай, кьезилвилерин кьадаррикай чир хьун патал “Госкъуллугъар” порталда анкета ацIурун герек я. Порталда гьар са кам галай-галайвал къалурнава.
«Лезги газет»
