“ЛГ”-дин алай йисан 15-нумрада Дагъустанда лезги халкьдин векилри “Автономная некоммерческая организация Культурно-просветительский центр имени Гасана Алкадари” (АНО КПЦ им. Г.Алкадари) ахъайнавайдакай хабар ганвай. РикIел хкин, ихьтин са тешкилат арадал гъунин теклиф “Лезги газетдин” чинрилай гьеле алатай йисуз Ярагъдилай тир жемиятдин деятель Гьажибуба Рустамовани ганай. Вич рагьметдиз фенватIани, адан фикир кьилиз акъатна.
Медениятдинни марифатдин центр тешкилуниз чна майил ийизва, лезги интеллигенцияди, халкьди ам хъсан кIвалах яз кьабулзава ва тебрикзава. Центр чи халкьдин арадай акъатнавай арифдар, тарихчи, диндин ва светский рекьяй алим, шаир, “къарагъ, лезгияр, ахварай ават, уях хьухь, экъечI майдандиз” лагьай Гьасан эфендидин тIварунихъ ягъун кутугай кар хьанва. Алимдин ктабри — “Асари Дагъустан”, “Диван-ал Мамнум”, “Жираб-ал Мамнум” — лезгияр дуьньядиз машгьурна.
Центрадиз, зи фикирдалди, пулдалди асул гьисабдай лезги миллетдин векилри куьмек гуда. Мисал яз, “Лезги газет” кхьенвай гьар са касдивай лезги чIал, меденият, милли ирс, адетар, жемятдин марифат хкажуник кутазвай пай я лагьана, чпелай алакьдай куьмек гуз жеда. Газетдин тираж алай вахтунда 6000-далай алатнава. Гьар са подписчикди центрадин гьисабдиз 1000 манат ягъайтIа, арадал 6 миллион манат пул къвезва. И такьатрихъ Кьиблепатан Дагъустанда, махсус проект арадал гъана, мисал яз, хъсан са завод эцигиз жеда. И жегьетдай СтIал Сулейманан райондихъ хъсан тежриба ава. Ана жемиятдин тешкилатрин, фондарин куьмекдалди проектар гьазурна, государстводин гьукумдин органрив агакьарзава, бюджетдин пулар ва инвестицияр желбдай рекьер жагъурзава…
Алкьвадар Гьасанан тIвару-нихъ галай центрадин директор Мегьамед Ибрагьимовни кар алакьдай, халкьдихъ рикI кузвай жегьил алим я. Кьиблепатан Дагъустанда тухузвай чи миллетдин гьар са мярекатда ада активнидаказ иштиракзава. Чна умуд кутазва ва чун инанмиш я хьи, адалай чи халкь патал еке метлеб авай центрадиз бегьерлудаказ регьбервал гуз жеда. Къуй адахъ кIвалахда мадни еке агалкьунар хьурай!
Исятда Мегьарамдхуьруьн райондин Советский хуьряй 250-далай виниз инсанри чпин хизанарни галаз Урусатдин жуьреба-жуьре регионра кIвалахзава (зав абурун сиягь гва). Ихьтин гьалар чи амай районрани ава. Чкадал кьил хуьдай мумкинвилер тахьуникди гзафбур, хайи хуьрер таз, патарал физва. Ихьтин гьалара лезги хуьрера тIапIар алай кIвалерин кьадар гьар йисуз артух жезва.
Чи халкь, чи чIал, меденият, гележег патал зиянлу и гьерекатдин вилик пад кьун патал заз ихьтин теклиф гуз кIанзава: Советский хуьруьн патав ЦIийи Мамрач тIвар алай цIийи хуьр арадал атанва. Ам Кьиблепатан Дагъустандин 8 райондиз фидай рекьер санал гьалтзавай къекъуьндал ала. Ина хуьруьн майишатдин, я тахьайтIа промышленностдин еке са кархана хьанайтIа, гзафбур кIвалахдай чкайралди таъминариз жедай. И месэладиз цIийиз тешкилнавай центради, чи халкьдин вилик-кьилик квай векилри фикир гудайдак умуд кутазва.
Сулейман Пашаев,
Советский хуьр
