И йикъара Махачкъалада, “Дагъустандин хуьр” этнографиядин музейда вичин эсил Рутул райондин Хъуьлуьдрин хуьряй тир (1953-йисуз хуьруьн муаллимдин хизанда хана) кIарас, къван, кIараб гьялунин рекьяй машгьур устад, РФ-дин художникрин ва дизайнеррин союзрин член, РД-дин лайихлу художник Агъамирзе Тапаевич Агъамирзаеван яратмишунрин выставка ачухнава. ЧIехи залда дуьзмишнавай стендрилай, дезгейрилай, кьацIарилай устаддин гъиликай жуьреба-жуьре йисара хкатнавай кIарасдин гуьрчег затIари иниз атайбурун гьейранвилин гьиссерал чан гъизва, чи халкьдин искусстводин, гъилин-тупIун сеняткарвилерин тарихриз сиягьатиз тазва.
Девлетлу, къадимлу я чи халкьди кIарас, къван, кIараб, ракь, маса затIар гьялунин, абурукай аламатдин акунар, суьретар, туькIуьр хьунин (нехишрин муракабвал авай, санлай инсандин руьгь рахурдай затIар (къапар, кьватияр, нинияр, рак-дакIар, цларин паннояр, айванрин карнизар ва икI мадни) гьазурунин тарихар.
Гьахьтин устадрикай сад я художник Агъамирзе Тапаевични. Ада гьазурай гуьрчег затIар Махачкъалада шадвилеринни ял ягъунин гзаф залра, кафейра, театрра аквада. Хейлин ксари, ам чидайбуру, чпин кIвалера ада гьазурай мебель (столар, стулар, шкафар) эцигнава. Агъамирзе рак-дакIар, гурарар, балхунар нехишра тунин рекьяйни еке устад я…
Агъамирзе Тапаевича М.Жемалан тIварунихъ галай художественный училищеда кIвалахзава. 40 йисуз ада 400-лай виниз жегьилриз и къадим искусстводай чирвилер ганва. Ада вичи Махачкъалада Даггоспединститутдин худграфдин факультетда кIелна, кьилин пешекарвал къачуна (1976-йис). Сифтедай гьа вичи кIелай факультетда ассистентвиле, 1981-йисалай винидихъ тIвар кьунвай училищеда кIвалахзава.
Устаддихъ галаз чун мукьувай таниш я. Хъуьлуьда зун ада кIелай мектебда, ам чIехи хьайи бубадин кIвалера хьайиди рикIел хквезва.
Махачкъаладин Ленинан Комсомолдин тIварунихъ галай паркуна, куьгьне жез, кьуразвай тарарикай аламатдин скульптурадин къаматар, ацукьдай куьсруьяр туькIуьрдайла, адакай чна газетдани кхьенай. Чи паркара Агъамирзедин гъилерин устадвал, вилерин хцивал, руьгьдин жумартвал рикIел гъидай затIар гьалтда. Устаддихъ кьилиз акъуддай мурадар мадни гзаф ава. Кьилинди, чи халкьдин къадим сеняткарвилер хуьн я.
Выставка 31-майдалди давам жеда. Буюр, илиф!
Мерд Али Жалилов
