Малум тирвал, шахматрал къугъуни инсандин мефтIедив хъсандиз кIвалахиз, фагьум-фикир, кьатIунар, дикъет артухариз тазва. Гьаниз килигна шахматрал машгъул аялриз математика, география, тригонометрия хъсандиз чир жеда. Эхиримжи йисара чи мектебра шахматрай махсус тарсар расписанийра тун, кружокар тухунни дуьшуьшдин кар туш…
Курхуьруьн 2-нумрадин юкьван мектебда 4-классда вадралди кIелзавай Шайдаев Шайдадин шикил фадлай мектебдин Гьуьрметдин доскада ава. Шайда хъсан шахматистни я. Абурал къугъваз гададиз гьеле мектебдиз фидалди чир хьана. Адан дах Самрат, ими Амрат, чIехи буба Мажруддинни хъсан шахматистар, волейболистар, футболистар я. Абуру чпин веледдизни и крар кIанарнава. Самрата мектебда шахматрай тарсни, кружокни тухузва. Бубадин гъилик шахматрин цIийи сирер чирзавай хци вичин алакьунар 10-11-классра кIелзавай аялрихъ галаз къугъуналдини ахтармишзава. Ада мектебда, районда шахматрай акъажунра, конкурсра иштиракзава, приздин чкаяр кьазва. Мукьвара Шайдадив райондин спортдинни туризмдин отделдин председателди медаль ва диплом вахкана. Шайдадихъ инлай кьулухъ мадни еке агалкьунар хьун чи мурад я.
Райсудин Набиев,
зегьметдин ветеран
