1962-йисан 1-сентябрь. За Хив райондин АрхитIрин юкьван школада 5-классда кIелзавай. Чи классдиз цIийи руководитель — урус чIалан тарсар гудай муаллим Мегьамедов Абдурагьман Мегьамедович атана. Ам кьакьан буйдин, къати сес авай, Дагъустандин госуниверситетдин филологиядин факультет акьалтIарна хтанвай жегьил муаллим тир.
А вахтара урус чIал хъсандиз чIехи классра авай аялризни чидачир. Ам гъвечIи аялриз чирун мадни четин тир. Урус чIал чир тавуртIа, амай тарсар аялриз хъсандиз чир жедач. Гьавиляй гъвечIи классра урус тарсар гузвай муаллимрин жавабдарвал екеди тир. Аялриз Абдурагьман муаллим гзаф хуш хьана, ада гайи тапшуругъар, кIвализ гайи кIвалахар аялри кьилиз акъуддай, тарсара адахъ хъсандиз яб акалдай, урус чIал, грамматика чириз алахъдай. Гзаф хъсан муаллим тир. Вичиз рагьмет хьурай.
Абдурагьман 1936-йисан 20 ноябрдиз Хив райондин Вини АрхитIа дидедиз хьана. Дах Мегьамед фронтдиз тухвана, 1942-йисуз ам, азарлу хьана, рахкурна. Са тIимил вахтунилай ам рагьметдиз фена. КIвале чIехи диде Суна, кьве вах амукьна. Хизан хуьн, аялар чIехи авун диде Тамуман хиве гьатна. Тамум халади колхозда зегьмет чIугвазвай. Абдурагьман муаллимдин эме Бакуда яшамиш жезвай. Нуьдуьрбике эмеди Абдурагьман стхадин хизан дарвиляй акъудун патал Бакудиз тухвана. Ана ада 4-классдалди кIелна. Ахпа хуьре 7-класс, Дербент шегьерда школа-интернат куьтягьна. Сад лагьай йисуз адавай вуздик экечIиз хьанач, хтана, хуьруьн мектебда пионервожатый яз кIвалахна. Кьвед лагьай йисуз ам ДГУ-дин тарихдинни филологиядин факультетдик (урус отделение) экечIна. 1962-1966-йисара Абдурагьман муаллимди АрхитIрин юкьван школада кIвалахна. Гуьгъуьнлай Вини АрхитIрин муьжуьд йисан школадин директор хьана. 1973-1982-йисара ада муаллимрин пешекарвал хкаждай институтда кIвалахна, Махачкъаладин 22-нумрадин мектебда урус чIалан муаллим хьана.
1986-йисуз Абдурагьман Мегьамедович Даггоспединститутдиз преподаватель яз кьабулна. 2005-йисуз ада докторвилин диссертация хвена ва педагогикадин илимрин доктор хьана. Профессор Абдурагьман Мегьамедовичан илимдин кIвалахар 70-далай артух журналра чапнава. Ада 9 монография (гьа жергедай яз “Кавказдин дагъвийрин адетар”, “Дагъустандин халкьдин педагогикадин къизилдин къайдаяр”) чапнава.
А.Мегьамедов “Баркаллу зегьметдай” медалдиз, “РД-дин лайихлу муаллим”, “РФ-дин пешекарвилин образованидин гьуьрметлу работник” лагьай тIварариз лайихлу хьана.
Абдурагьман муаллим хъсан инсан ва педагог тир. Ахьтинбур рикIелай фидач.
Масуб Магьмудов
