И йикъара министррин кабинетдин кьил Артем Здунован регьбервилик кваз кьиле фейи Дагъустандин Гьукуматдин заседанидал вахтунилай виликан муддатда кьиле тухвай гьукуматдин сад тир имтигьанрин нетижаяр ва республика 2018-йисан асас муддатдин гьукуматдин нетижайрин аттестациядиз гьазур хьанвай гьал веревирдна.
И хиляй тухванвай кlвалахдикай галай-галайвал Гьукуматдин председателдин заместитель – Дагъустандин образованидинни илимдин министр Уммупазиль Омаровади ихтилатна. Ада малумарайвал, региондин информационный система туькlуьрна куьтягьнава ва 2018-йисан ГИА-дин иштиракчийрин кьадарни тайинарнава. Цlинин йисуз 14 агъзурдалай са тlимил гзаф аялри ГИА-да иштиракда, ибурукай саки 12 агъзур алай йисан выпускникар я. Региондин информационный системада агъзурни вад виш кьван ЕГЭ вахтунилай виликан муддатда вахкуз кlанзавайбур регистрация авуна.
У.Омаровадин гафаралди, вахтунилай виликан муддатда ЕГЭ вахкун патал вад пункт кардик кутуна. 2018-йисан вахтунилай виликан муддатдин имтигьанар, расписанидал асаслу яз, къайдаяр чlурай дуьшуьшар галачиз, видеогуьзчивилин гьалда кьиле фена. Имтигьанар кьиле фейи пунктарал (ППЭ) ЕГЭ кьиле физвай гьалдал гуьзчивал тухвай федеральный дережадин векилар алай.
Малум хьайивал, алай йисуз республикада ЕГЭ вахкунин асас муддатда 68 пункт кардик кутада. Алай вахтунда вири пунктар герек тир жуьреда тадаракламишнава.
Заседанидал Уммупазиль Омаровади 2018-йисуз выпускникриз «Кlелунра кьетlен агалкьунар къазанмишунай» медалар гунин карни гьахълудаказ тешкилуникай ихтилат кудна.
«Къизилдин медалар гунин тегьер акьван хъсан туш. Инсанар саки алцурарзава, гьикl хьи, къизилдин медалди вуздик экечlдайла алава яз 10 балл гузва», — къейдна Артем Здунова.
А.Здунова муниципалитетрин регьберриз ва депутатриз «къалп медалистрин» гьакъиндай арадал атанвай гьалариз кьетlен дикъет гуниз эверна. Ада алава хъувуна хьи, гележегда ихьтин выпускникар гьам кlелуна, гьам кlвалахда четинвилерал ацалтда.
«Им анжах директорриз талукь месэла туш. И месэлаяр къайдадик кутун патал чкайрал чаз образованидин отделар ава. Медалистрикай анжах 34 процентди медаль къачун патал герек тир чирвилер тестикьарна», — заседанидал алай районрин ва шегьеррин кьилерихъ элкъвена, къейдна премьер-министрди.
Образованидин, илимдин, медениятдин, жегьилрин крарин рекьяй, спортдай ва туризмдай Халкьдин Собранидин Комитетдин председателдин заместитель Гьамидулагь Мегьамедова медалистрин месэладин жигьетдай баян гана.
«Виликдай и месэла чна гьялзавай. Хиве кьуна кlанда, эхиримжи вахтара ЕГЭ терефкарвал авачиз кьиле тухузва. Гьа са вахтунда чирвилерин ериди гьеле «кьецlивалзава», — къейдна Гьамидулагь Мегьамедова.
Эхирдай муниципалитетрин регьберрин, депутатрин патай гуьзчивал тухунин чарасузвилин гьакъиндай проектдин къарардик пункт кухтун теклифна. «Чи аялриз, образованидин министрдиз ва и крариз фикир гузвай вирибуруз агалкьунар хьурай», — лагьана А.Здунова.
«Лезги газет»
