Алатай йисан 18-майдиз, Дагъустандин халкьдин шаир Стlал Сулейманан хайи юкъуз, Агъа Стlалрин хуьре цlай кьуна кайидалай кьулухъ цlийи хъувур шаирдин Кlвал-музей ачухунин шад мярекат кьиле фенай.
Къейд ийин, музей арадал хкунин кардик гзаф тешкилатри, кьилдин ксари чпин пай кутуна. И кардик «Регьимдин сергьятар» мергьяматлувилин фондуни, «Минеральный «Рычал-су» ятарин завод» ООО-ди чпин пайни кутуна. Ибурулай гъейри, патал яшамиш жезвай районэгьлийрини кьетlен куьмекар гана.
Вичин ери-бине Агъа Стlалрилай тир «Монолитхолдингдин» регьбер Разим Абасова музей арадал хкуниз 1 миллион манат чара авуна. Алдай вахтунда и такьатрихъ гьаятдин жугъундин бетондин пай гуьрчегарунин, официальный мярекатар патал подиум туькlуьрунин ва маса крар тамамарзава. Гъиле кьунвай крар 18-майдалди куьтягьдайвал я.
Сулейман-Стальский райондин кьил Нариман Абдулмуталибова чкадал фена, кlвалахар тамамарзавай гьал ахтармишна. Ада ватанперес районэгьли Разим Абасоваз чухсагъул малумарна.
«Лезги газет»
