Виликан планрин чкадал гила, девирдин дегишвал яз, проектар кардик акатнава. И кьве девирда, чIала гьатзавай дегишвал яз, и гафариз фикир гайила ахьтин фикир арадал къвезва хьи, гуя кар-кIвалах гьеле гъиле кьадалди, адав эгечIдалди проект чIугун, кьабулун лазим я, адакай хкатдай менфятдикай, акъатдай харжийрикай ва авай мумкинвилерикайни фикирар ийида. А гьазурвал авачир кар кьилиз акъатдач. Гьа гереквал, важиблувал хас я гьар са кардизни.
“Къиметрал гуьзчивалда” лугьузва. Амма — гьикI? Дугъри я, мекераяр кьиле тухуда. Гьа идалди базаррал таза продуктарни гъиз жеда. Амма базардин къимет базаррал гьамишалугъ чкаяр кьунвай “халуйрив” гва эхир. Базардин экономикадин девир гьахьтинди я кьван.
Манасдин базарда хемис йикъара акI туш. Гьар сада вичин хсуси майишатда гьасилнавай затI маса гузва. Гьафтеда са югъ базардинди я. Жуван мумкинвилиз, базардиз акъудзавай затI жуваз акъваззавай къиметдиз ва ам маса гана туькIуьрзавай жуван дердидин важиблувилиз килигна. Гьар са касдихъ вичин хсуси къимет ава и базарда, гьар са метягьдиз, маса гузвай ва къачузвай затIуниз…
ГьакIан “гуьзчивалда” гафуналди къиметар хуьз жедач. Къуьл къецепатан уьлквейриз маса гузва. Гьа са вахтунда чи уьлкведа къе вичяй са килограммни къвен тийизвай са буханка фан къимет 30-40 манат я.
Гьикьван ава чи республикадихъ чIурухъанар! Вучиз абурукай менфят къачузвач? Мегер гьакьван къуватсуз хьанвани Дагъустан? Зун агъазвач. Са кар якъин я: амач халкьдин (халкьарин) садвал, хатур-гьуьрмет, гьахъвал, гьар са карда дуьзвал. Ина я авайди къенин, пакадин ва гележегдин абадвални.
Гьа ихьтинбур, халкьдиз суьрсет гудай терефрихъ элкъуьрнавайбур хьун лазим я гилан сифте нубатда кардик кутазвай проектар. Амма гьамиша икI жезвач. Гьайиф!
А. Гьажимурадов
