СтIал Сулейманан райондин администрациядин пресс-къуллугъди хабар гузвайвал, алатай гьафтедин ял ядай йикъара Сардархуьре дзюдодай республикадин кIвенкIвечивал патал 2008-2010-йисара дидедиз хьайи жаванрин арада акъажунар кьиле фена.
Гьар йисуз кьиле тухун хъсан адетдиз элкъвенвай и турнир райондин спортдин, туризмдин ва жегьилрин крарин рекьяй комитетдин ва райондин образованидин управленидин куьмекни галаз тешкилнавайди Кьасумхуьруьн дзюдодин ва самбодин школа тир. Алай йисуз спортдин серенжемда чи республикадин жуьреба-жуьре пипIерай атанвай 100-далай виниз жаванри чпин устадвал къалурна.
Къизгъин бягьсерин нетижада СтIал Сулейманан райондин команда 1-чкадиз лайихлу хьана. Мегьарамдхуьруьн райондин командади — 2, Буйнакск шегьердин командадини 3-чкаяр кьуна.
Гъалиб хьайи командаяр талукь дережайрин дипломар, грамотаяр ва кубокар гуналди къейдна.
«Лезги газет»
