Зенд

Алай йисан 20-мартдиз СтIал Сулейманан райондин  Эминхуьруьн юкьван мектебда лезги чIалайни литературадай  “Лезги газетдин” редакцияди ва “Леки” фондуни теш­килнавай олимпиада кьиле фена.

И сеферда ана Хасавюрт райондин Къурушрин хуьруьн юкьван 1-2-нумрайрин мектебрай 11-класс­ра кIелзавай кьве аялдини иштиракна. Дуьз лагьайтIа, чаз алатай йисузни теклифнавай, амма рехъ яргъал яз акуна, чавай иштиракиз хьанач, гьелбетда, и кардикай, ана олимпиада тухузвай тегьер акурла, за ги­ла гьайифни чIугвазва. Зун аялар галаз гзаф олимпиадайриз фена, гьайиф хьи, заз хала-хатурвални авур чкаяр акуна,  амма икI ачухдаказ, михьидаказ, анжах аялрин чпин куьмекдалди тухвай олим­пи­ада сад лагьай сефер я. Заз олим­пиада тухудайла, жюридин председатель, “Лезги газетдин” кьилин редактордин заместитель Куругъли Ферзалиеван михьивал акуна, ана бязи аялриз сад хьтин баллар хьанвай, и месэладин патахъай ам залда кIватI хьанвай муаллимрални маса жавабдар векилрал алукьна, абурув кьилдин тапшуругъар вахкана, нетижада абурун арадай лайихлубуруз чкаяр гана. Сад-кьве гаф Эмин­хуьруьн юкьван мектебдин директор Рагьман Османован адресдиз лугьуз кIанзава. Ада патарихъай олимпиададиз атанвай вири  аялрин, муаллимрин, маса мугьманрин къайгъударвал чIугваз­вай, лугьудайвал, мугьманар къаршиламишиз вири коллектив “са кIвачел” акъвазнавай, мектебдин пищеблок халисан лезги хуьрекрин “ярмаркадиз” элкъуьрнавай. Сагъ­рай­ ам ва ада регьбервал гузвай мектебдин коллектив, чпихъ мадни­ еке агалкьунар хьурай!

Хайи чIалахъ, лезгивилихъ рикI кузвайвиляй и олимпиададал кьил чIугваз райондин кьил Нариман Шамсудиновични атана, ада олимпиада кьиле физвай гьал ва аялар авай кабинетар ахтармишна.

Эхирдай чкаяр къазанмишай аялрив дипломар, грамотаяр, пулдин премияр ва маса савкьатар вах­кана. Дугъриданни, олимпиада лезги чIалан сувариз элкъвена, лезги чIа­лахъ акьалтзавай чи  несил патал­ еке метлеб авайди тестикьарна.

Ихьтин мярекатар сувариз элкъуьрзавай, хайи чIалахъ рикI кузвай, кьиле “Лезги газетдин” кьилин редактор Мегьамед Ибрагьимов аваз зегьмет чIугвазвай вири стхайризни вахариз, “Леки” фондунин векилриз жуван патай рикIин сидкьидай чухсагъул, мадни еке агалкьунар хьурай лугьуз кIанзава.

Гьуьрметлу лезгияр, чIал хуьх!

Гьажи  Къазиев, муаллим