Эминхуьруьн библиотекада хуьруьнвияр — РФ-дин культурадин лайихлу работник, Россиядин журналистрин Союздин член Алаудин Гьамидован “Багьа чил — багьа накьвар” ва Россиядин журналистрин, лезги писателрин союзрин член Хазран Кьасумован “ЗуькIуьд булах” ктабрихъ галаз танишаруниз талукьарнавай мярекат кьиле фена.
ЦIийи ктабрикай, абурун авторрикай куьрелди суьгьбет авуналди, мярекат библиотекадин заведующий Алла Буржалиевади ачухна.
Хуьруьн агъсакъалрин советдин член Исмаил Агьмедова Алаудин Гьамидован уьмуьрдин ва яратмишунрин рекьикай, адан “Багьа чил — багьа накьвар” ктабдикай гегьенш рахунар авуна. Къейд авурвал, вичин уьмуьрдин чIехи пай журналистикадиз бахш авур А.Гьамидован ктабда ада жуьреба-жуьре йисара ХпитIрин хуьруькай, вичин руьгьдин стхайрикай, алимрикай, машгьур ксарикай кхьенвай макъалаяр, очеркар гьатнава. Эсеррай Алаудин Гьамидован журналиствилин кьетIен бажарагъ, ватанпересвал, пешедал кьарувал аквазва.
“ЗуькIуьд булах” ктабдихъ галаз мярекатдин иштиракчияр адан автор Хазран Кьасумова танишарна. ЗуькIуьд булах автор дидедиз хьайи Ялцугърин хуьре — лезгийрин рикI алай шаир Е.Эминан ватанда ава. Авторди цIийи ктабда гьатнавай вичин шиирарни кIелна.
Мярекатдал рахай муаллимри — Жейран Мирзоевади, Гуьлханум Наврузовади, шаир ФатIимат Османовади, халкьдин манияр тамамарзавай Раижат Жигеровади, 11-классдин ученик Амирхан Османова ктабрикай чпин фикирар лагьана.
Асият Мирзалиева
