Алатай гьафтеда Агъа СтIалрин юкьван мектебда “Лезги газетдин” редакциядин махсус проектдин сергьятра аваз акъуднавай “Лезги чIал чирин” ктабдин презентация кьиле фена. Мярекатда СтIал Сулейманан райондин кьил Нариман Абдулмуталибова, “Лезги газетдин” кьилин редактор Мегьамед Ибрагьимова, райондин кьилин сад лагьай заместитель Лацис Оружева, РФ-дин Президентдин патав гвай РД -дин Гьамишалугъ Векилханадин Общественный Советдин член Мурад Мегьамедкеримова, образованидин управленидин начальник Гьуьсейн Шихбабаева, депутатрин собранидин председателдин заместитель Максим Аскерова, Агъа СтIалрин хуьруьн администрациядин кьилин везифаяр вахтуналди тамамарзавай Надир Эфендиева, мектебрин директорри ва масабуру иштиракна.
Мярекат Агъа СтIалрин хуьруьн мектебдин директор Феликс Магьмудова ачухна ва ктабдикай суьгьбетун патал гаф Мегьамед Ибрагьимоваз гана. Ада къейд авурвал, цIийи ктаб сифте нубатда аялар патал гьазурнава. Ана лезги сесер арадал гъизвай органрикай, пIузаррин ачух тушир сесерикай малуматар, жуьреба-жуьре тапшуругъар гьатнава. Ктабдин кьетIенвилерикай сад ам я хьи, ана материалар кьве чIалал ганва: лезги ва урус. Адакай гьакIни лезги чIал чириз кIанзавай вирибурувай менфят къачуз жеда.
Гуьгъуьнлай рахай Нариман Абдулмуталибова лезги чIал хуьнин ва вилик тухунин рекье “Лезги газетдин” редакцияди тухузвай кIвалахдиз еке къимет гана, М.Ибрагьимовани К.Ферзалиева акъуднавай “Лезги чIал чирин”, “100 тапшуругъ” ктабрин кьетIенвилерикай рахана, коллективдихъ агалкьунар хьун алхишна.
Мярекатдин сергьятра аваз М.Ибрагьимова “Лезги чIалан ктабар — мектебриз” серенжем кьиле тухузвайдакай ва адан сергьятраваз мумкинвилер авай стхайри, вахари чпин хайи хуьрерин мектебриз ктабар маса къачузвайдакай хабар гана. ИкI, сифте яз и проектдик СтIал Сулейманан райондин векилри пай кутуна: РФ-дин Президентдин патав гвай РД -дин Гьамишалугъ Векилханадин Общественный Советдин член Мурад Мегьамедкеримова, карчияр тир Разим Пирмегьамедовани Вагиф Исмаилова райондин мектебра 1-классра кIелзавай аялриз паюн патал 660 экземпляр маса къачуна. Мергьяматлувилин и кардиз чи ватанэгьлийри 195 агъзур манат пул чара авуна.
Хайи чIал хуьник еке пай кутунай ва аялриз ктабар савкьат авунай М.Мегьамедкеримоваз, Р.Пирмегьамедоваз, В.Исмаиловаз райондин кьил Нариман Абдулмуталибова сагърай лагьана.
РикIел хкин, “Лезги чIал чирин” ктаб акъудуниз пулдин такьатар чара авурди (160 агъзур) Агъа СтIалрин хуьряй тир, алай вахтунда Ставрополь шегьердин Думадин депутат Казбек Агъаларов я.Къуй чи ватанэгьлийрин садакьаяр Аллагьди кьабулрай ва абурун берекатар артух хьурай!
Агьмед Магьмудов
