Усугъчайдилай тир Наврузоврикай рахадайла, рикIел сифте нубатда игитвилеринни кьегьалвилерин сагьибрин тIварар къведа: Ханбике Наврузовна, Сократ Гьажиевич, Сабир, Сейфедин Наврузовар ва икI мадни…
И йикъара мад са шад хабар: Сабир Эмирсултанович Наврузован хтул Гьажиди тайский боксдай Таиландда кьиле фейи чемпионатда дуьньядин чемпионвилин тIвар, чIул, къизилдин медаль къачунва!
Хабар гьасятда хизан яшамиш жезвай Москвадив, чIехи бубаяр яшамиш жезвай Махачкъаладив ва Усугъчайдив агакьна! Чаз муштулух чIехи буба Сабира гана.
Эхь, Сабир Эмирсултановичан хтул Гьажидикай идалай виликни спортдин рекьяй (сифтедай футболдай, ахпа боксдай) кьакьан гьасиррин сагьиб хьана. 2017-йисуз Грозныйда, адалай вилик — Казань шегьерда тешкилай чемпионатра тайский боксдай дуьньядин Кубокар къачуна, и рекьяй ам пешекар боксеррин жергеда гьатна.
Гила Бангкокда (Таиланддин меркез) кьиле фейи чемпионатда Гьажи Надирович Наврузова ярумчух финалда Бразилиядай тир боксер нокаутдиз ракъурна. Финалда лагьайтIа, Украинадай атанвай вад сеферда дуьньядин чемпионвилин дережаяр къачунвай боксер вичин гужлу гъутаривди кIурарик вегьена!..
Гьажи Докъузпара райондин центр Усугъчайдал дидедиз хьана, спортдин вердишвилер Москвада вичин буба, РФ-дин лайихлу тренер Надир Сабировичан гъилик къачуна. Ам лагьайтIа, Москвада яшамиш жез хейлин йисар я. 1997-2008-йисара Москвада тайский боксдай Федерациядин председатель тир. Гила а къуллугъ Надиран хва Гьажиди давамарзава.
Дуьньядин чемпионди WMF версиядай, чIехи заланвал (91 кг) авай боксеррин арада галаз-галаз вад бягьсина вад гъалибвал къачуна! Чна чи пагьливандиз агакьнавай дережаяр рикIин сидкьидай мубаракзава:
Къуй, алатиз асирар,
МуьтIуьгъ хьуй ваз гьасирар!
Чна валди дамахда,
Кхьиз цIийи шиирар…
Мерд Али
