“Илимдилай зурба девлет авач”, — лугьузва халкьдин мисалда. Гьакъикъатдани, халкьдин кьадардив гекъигайла, маса халкьарилай тафаватлу яз, лезгийрин арада алимар гзаф ава. И йикъара мад са алим алава хъхьанвайдакай чав Москвадай шад хабар агакьна.
Малум хьайивал, РФ-дин МОН-дин ВАК-ди чи ватанэгьли Марият Даировна Шихнабиевадин алимвилин дережа тестикьарунин ва медицинадин илимрин кандидатвилин диплом гунин гьакъиндай къарар акъуднава.
Марият Шихнабиева 1989-йисан 19-июлдиз Махачкъала шегьерда алимрин хизанда дидедиз хьана. 2010-йисуз Дагъустандин медакадемия тафаватлудаказ акьалтlарна, 2010-2012-йисара “Терапия” пешедай ординатурада кlелна. Адахъ къенепатан азаррин ва ультразвуковой диагностикадин (УЗИ) рекьяй пешекарвилин шагьадатнамаяр ава. 2013-йисуз Марията “Ультразвуковая диагностика” пешедай чирвилер артухарун патал Москвада авай Сеченован тlварунихъ галай институтда курсар кlелна. Адан пешекарвилин алакьунриз курсунин кураторди еке къимет гана. Пешедин рекьяй вини дережадин ерияр къалурай Марият Шихнабиевадиз институтдин алимри “чаз куьн хьтин пешекарар герекзава”, лагьана, абуру ам ватандизни ахъай хъувунач.
Курсара хьайи 53 касдикай муькуьбуруз тавур теклифар анжах Марият Даировнадиз авуна. Нетижада адакай Москва шегьердин Центральный округдин Арбат куьчеда авай машгьур поликлиникадин къуллугъчи хьана. Кlвалахдин юлдашрин ва сагъариз къвезвайбурун арадани Марият Шихнабиевадихъ чlехи гьуьрмет ава. Адан пешекарвилин хъсан ерияр, алакьунар Москва шегьердин здравоохраненидин департаментдин регьбердин патай ганвай чухсагъулдин чарарини субутзава. Алай аямдин УЗИ-дин вири жуьредин къайдайрикай адахъ тамам чирвилер, кlвалахдин рекьяй вини дережадин тежриба ава.
Медицинадин рекьяй алим Марият Шихнабиева 60-далай гзаф илимдин кlвалахрин, гьа жергедай яз монографиядин автор ва Россиядин медицинада ультразвуковой диагностикадин пешекаррин Ассоциациядин член я. Ада Россиядин сергьятра кьиле физвай жуьреба-жуьре илимдинни тежрибадин конференцийра, съездра ва маса мярекатра иштиракзава.
Кьетlендаказ къейд ийиз кlанзава хьи, винидихъни ла-гьайвал, Марият Даировна алимрин хизандай я. Адан буба Даир Абдулкеримович Шихнабиев меди-цинадин илимрин доктор, ДГМУ-дин профессор, диде Саимат Бейбалаевна Юзбегова филологиядин илимрин кандидат, РАН-дин ДНЦ-дин ИЯЛИ-дин илимдин чlехи къуллугъчи, Марият Даировнадин чlехи вах Наида Шихнабиева (Сулейманова) медицинадин илимрин доктор, Дагъустандин медакадемидин акушервилин ва гинекологиядин кафедрадин доцент, Дагъустандин лайихлу духтур, кьилин категориядин пешекар ва гинекологиядин отделенидин заведующий, юкьван вах Эльмира Шихнабиева медицинадин илимрин кандидат, ДГМУ-дин стоматологиядин рекьяй пешекарвилин дережа хкаждай кафедрадин доцент ва кlелунин крариз килигдай хилен заведующий я.
Шихнабиеврин хизанда илимдин дережа авачирди са Марият тир, гила амни багърийрин адетдай физва. Марият Даировнадин кьилив къвезвай начагъбуру Интернетда кардик квай “Духтуррикай” сайтда адан гьакъиндай алхишдин келимаяр кхьизва:
“Марият Даировна дерин чирвилер авай духтур, рикl ачух инсан, вичин кар хъсандиз чизвай пешекар я”.
“Начагъ касдиз гьуьрмет ийидай, еке дикъет гудай, регьимлу духтур я”.
“Галай-галайвал гъавурдик кутазва, дикъетлудаказ ахтармишзава. Алай вахтунда ихьтин мергьяматлувал вирибурун патай аквазвач”…
Дерин чирвилер, алакьунар авай лезги алимдихъ меркезда нуфуз хьунал багърийри ва вири ватанэгьлийри дамахзава.
«Лезги Газет»
