Ханты-Мансийский автономный округдин чилел хейлин лезгияр яшамиш жезва. Чкадал чи ватанэгьлийрихъ жезвай месэлаяр гьялун патал ина са шумуд шегьерда лезгийрин милли тешкилатар арадал гъанва. Гьелбетда, чи халкьдин садвилиз манийвилер гуз алахъзавайбурни авачиз туш. Амма рикIе ватанпересвилин гьиссер авай кьегьал стхайринни вахарин алахъунар, гьунарар себеб яз, чалай хайи накьваривай яргъа авай чкада чIални хуьз алакьзава, милли адетарни.
ИкI, 26-февралдиз Покачи шегьерда лезги халкьдин векилрин гуьруьш кьиле фена. Адан сергьятра аваз и шегьерда лезгийрин милли медениятдин автономия арадал гъидай къарар кьабулна. Къейд ийин хьи, Покачида виликдай “Виридуьньядин лезги халкьарин Конгресс” МОД (Межрегиональное общественное движение) кардик квай. ЦIийи тешкилат арадал гъуналди, чна МОД-дин кесер мадни мягькемарна. Лагьана кIанда, уьлкведин кеферпата авай лезгийрин милли тешкилатри ФЛНКА-дихъ галаз сих алакъаяр хуьзва. Анин регьбер Ариф Керимова чаз вири рекьерай куьмекар гузва. Сагърай вич!
Чи цIийи тешкилатдин кьил яз мярекатдин иштиракчийри Идрис Ражабович Ражабов хкяна. Адан бине Ахцегь райондай я.
Хайи чIалал акъатзавай газетдин чинилай заз, жуван ватанэгьлийрихъ элкъвена, лугьуз кIанзава: играми стхаярни вахар, куьн гьина аватIани, дидед чIални бубайрин адетар рикIелай алудмир, абур чи тарихни я, пакадин югъни!
Жалауддин Абдуразакьов,
ФЛНКА-дин Советдин член
