1975-йисуз, ДГУ-дин филологиядин факультет куьтягьнавай урус чIаланни литературадин жегьил муаллим яз, зун Кьурагьиз рекье тунай. Гьа вахтарин къанунралди, вуз акьалтIарай пешекарар пуд йисуз дагълух хуьрериз кIвалахиз ракъурдай. Кьисметди зун Кьурагьрин 2-нумрадин юкьван мектебдиз акъуднай.
Мектебдиз сифте кам къачунмазди, зал гьалтайди са йис вилик Дагъустандин пединститут куьтягьна, ина кIвалахзавай Фазина муаллим хьана. Гуьруьшмиш хьайи сифте декьикьайрилай чи арада дуствилин, вахвилин гьиссер куькIвенай.
Са йисалай, хизан кутун себеб яз, зун Махачкъаладиз хтанай. Амма чи арада авай михьи, къени рафтарвилер Фазина муаллимдин эхиримжи йикъалди давам хьанай.
Инсанар ава чирагъди хьиз экв гудай, чпикайни атIана, патав гвайдаз куьмек ийиз алахъдай, гъил яргъи ийидай. Зи вах Фазинани гьахьтин жумарт инсан тир. Диде-буба агьил инсанар тирвиляй, гьар мажиб атайла, ада пулунин са пай шегьерда кIелзавай вичин стхайриз ракъурдай…
Фазина Ибрагьимовнади хейлин йисара Кьурагьрин 2-нумрадин юкьван мектебда урус чIаланни литературадин тарсар ганай. Гуьгъуьнлай директордин заместителдин везифаярни тамамарна, вичин вири уьмуьр образованидин хилез бахшна.
Итим кьилел алачиз, кьве велед чIехи авуна, абуруз дуьз тербия, кьилин образование гана, гьардакай са пешедин иесияр авуна.
Фазина муаллимдиз, хъсан инсандиз ва тербиячидиз, коллективдани, хуьруьн жемятдин патайни еке гьуьрмет авай. Хуьруьнвийри лугьудайвал, кимел ацукьнавай яшлу итимри, ам кимин патавай фидайла, кIвачел къарагъна, адан салам кьадай.
Фазина Ибрагьимовнадихъ чIехи мурадар авай, амма… Чи арада амайтIа, алай йисуз ада вичин веледрихъ, хтулрихъ, мукьва-кьилийрихъ галаз санал шаддаказ 70 йисан юбилей къейддай. Гьайиф хьи, ам чи арада амачиз 9 йис жезва.
Къуй Аллагьди адан веледриз — Гьамидазни Лейладиз, хтулриз яргъи уьмуьрар гурай. Фазина Ибрагьимовнадин эхиратдин кIвал къени хьурай, адан суруз нур къурай. Вун чи рикIера гьамишалугъ амукьда, зи играми Фазина вах.
Алимат Баламирзоева,
лезги чIалан муаллим
