—           Яшар  хьанвай инсанри бедендин къуват гьисс авун ва кефияр хъсан хьун патал агъадихъ галай рецептдикай менфят къачун меслятзава: са истиканда авай кIерецдин хвехвер, 200 г цилер авачир чIулав кишмишар, 100 г лацу киш­ми­шар вири сад-садак какадарна, са банкадиз вегьена, винелай 0,5 л эрекь илична, 10 йикъан вахтунда мичIи чкада эцигда. Банка гьар юкъуз юзурда. Ихьтин­ къаришма гьар сеферда фу недалди вилик хуьрекдин са тIуруна авайди цихъ галаз ишлемишда.

—           РикIин азар аваз, чиник, гъилерик, кIвачерик дакIун акатнавайла, петрушка хъчади хъсандиз куьмекда. Дарман-къаришма икI гьазурда: 800 г петрушкадал 1,5 л нек илична, духовкада эцигда. Ам сифте авайдалай са паюнин кьван тIимил хьайила, куьзна, гьар са сятдилай хуьрекдин 2 тIуруна авайди ишлемишда.

—           Шекердин азар авайла, рябинади хъсандиз куьмекда. Дарман-къаришма  икI гьазурда: рябинадин са пай тваррал 10 пай эрекь илична, кIвалин гьава авай мичIи чкада 21 юкъуз эцигда. Ахпа ам куьзна, йикъа пуд сеферда чайдин са тIуруна авайди ишлемишда.

—           Мекьи вахтунда гзаф инсанар гриппдик ва гьакIни мекьивилелай азарлу хьайи вахтунда са истиканда авай кудай некIедиз хуьрекдин са тIуруна авай дуьдгъвер, гьакьван вирт ва 1,2 чай­дин тIуруна авай хуьрекдин сода ве­гьена, ксудалди вилик хъвада.

—           Туьтвер тIазвайла (ангина), са­ ис­тиканда авай чими циз чайдин са тIуруна авай лимондин шире яна, туьтвера экъуьр­да.

—           КIвачер дакIунвайла, гьар юкъуз 100-150 г. кьурурнавай машмашдин патар тIуьн ва гьакIни кIвачеривай муркIа­дин кIусар гуьцIун меслят къалурзава.

—           Дамарра ивидин  гьерекат агъузарун патал са истиканда авай циз десертдин тIуруна авай ичерин сирке ва гьакьван вирт алава хъувуна, экуьнахъ ва нянихъ ишлемишда. Эгер хуквадин кислотность гзаф яз  хьайитIа, ам — фу тIуьрдалай кьулухъ, тIимил яз хьайитIа, фу недалди вилик ишлемишда.

—           Япара ван авайла, хуьрекдин са тIуруна авай мелисса хъчарал са истиканда авай ргазвай яд илична, 30 декьикьада тада. Ахпа ам йикъа 5-6 сеферда хуьрекдин 2 тIуруна авайди ишлемишда.­

—           Мелиссади рикI тIазвайла, рикIи фад-фад кIвалахзавайла, ахвар текъведайла, кьил элкъвезвайла ва кьил тIазвай­­лани, хъсандиз куьмекда. Ада нервияр се­кинарзава. Ам гьакIни руфуник ял квайла, дуркIунар тIазвайла, бедендик иви тIимил квайла,  ишлемишунни меслят къалурзава.­

“Айболит” газетдай.

Гьазурайди — Надият  Велиева