13-февралдиз СтIал Сулейманан райондин ЦIийихуьруьн юкьван мектебда жегьил алим-физик, физикадинни математикадин илимрин доктор Заур Алисултанован тIварунихъ галай сад лагьай олимпиада кьиле фена. Мярекат мергьяматлувилин “Иман” фондунин куьмекдалди муниципалитетдин администрацияди тешкилна.

Олимпиадада СтIал­ Сулейманан, Ахцегь, Мегьарамдхуьруьн, Кьурагь, Хив районрай тир 10-11-классра кIел­завай 42 аялдин чирвилер ахтармишна. Абурун кIвалахриз къимет Заур Али­султанова ва физикадинни математикадин илимрин кандидатар тир Адлер Гьамзатовани Гьажимирзе Рагьимханова гана.

Нетижада 11-классда кIел­за­вай аялрин арада 1-чка — Эльвира Къафаровади (ЦIийихуьр), 2-чка — Зилефат Мегьамедовади (Вини СтIал), 3-чка Алина Асретовади (ЦIийихуьр) кьуна.

10-классда кIелзавайбурун арада кIвенкIвечи чкаяр кьуна:  Шамил Тагьирова (1-чка, ЦIийи­хуьр), Гьуьрипери Гьажиевади (2-чка, Агъа СтIалрин Къазмаяр) ва Рамазан Тагьирбегова (3-чка, КIирийрин хуьр).

“Иман” фондуни 11-классда кIелзавай аялрин арада гъалиб хьайибуруз 25, 20, 15 агъзур манатдин, 10-классда кIелзавай аялрин арада кIвенкIвечи чкаяр кьурбуруз 20, 15, 10 агъзур манатдин кьадарда аваз пулунин пишкешар гана. Гьа и кьадарда аваз пулунин пишкешар гъалибчийрин муаллимризни гана. Олимпиададин вири иштиракчийриз рикIел аламукьдай савкьатарни багъишна.

Мярекатда СтIал Сулейманан райондин кьил Нариман Абдулмуталибова ва “Иман” фондунин векил Мурад Ханбалаевани иштиракна.

Чи мухбир