И йикъара 88 йисан яшда аваз Урусатдин илимдин лайихлу деятель, физикадинни математикадин илимрин доктор, профессор Рзахан Гуьлмегьамедович Алиев рагьметдиз фена.
Р.Г. Алиев 1934-йисуз Кьурагь райондин Цилингрин хуьре дидедиз хьана. Зегьметдин рехъ 1954-йисуз Кьурагьрин юкьван мектебда муаллим яз кIвалахунилай гатIунна. 1963-йисуз илимрин кандидатвилин диссертация хвейидалай кьулухъ ам ДГУ-да тарсар гуз эгечIна. 1983-йисуз алимди МГУ-да докторвилин диссертацияни агалкьунралди хвена.
Р.Алиева университетда математикадин рекьяй вири уьлкведиз машгьур хьайи илимдин мектеб арадал гъана ва хейлин йисара адаз регьбервални гана. Адан гъилик 18 аспирантди кандидатвилин диссертацияр хвена.
Рзахан Гуьлмегьамедовича республикада, Урусатдин жуьреба-жуьре регионра, къецепатан уьлквейра кьиле фейи илимдин хейлин конференцийра иштиракна. Алимдин регьбервилик кваз “Функционально-дифференциальные уравнения и их приложения” тIвар алай илимдин макъалайрин кIватIал акъатзавай. Ам “Вестник ДГУ” журналдин редколлегиядин член тир. Профессор хейлин йисара “Дифференциальные уравнения” пешекарвиляй илимрин кандидатвилин диссертацияр хуьзвай ДГУ-да кардик квай Советдин кьиле акъвазна.
Илимдин рекье чIехи дережайрив агакьай чи ватанэгьлидин къелемдикай цIудралди илимдин макъалаяр, кьве монография хкатна. Ада студентарни аспирантар патал махсус пособияр гьазурна. Абурукай чи йикъарани университетда менфят къачузва.
Рзахан Гуьлмегьамедович ДГУ-дин гьуьрметлу профессор тир. 2017-йисалай ада, пенсиядиз экъечIна, ял язавай.
Илимдин рекье къазанмишнавай агалкьунар фикирда кьуна, Рзахан Алиев 2004-йисуз РФ-дин Гьукуматдин къарардалди Дуствилин ордендиз лайихлу хьана.
“Лезги газетдин” редакцияди Р.Г.Алиеван хизанриз, вири мукьва-кьилийриз башсагълугъвал гузва. Адан экуь къамат чи рикIера амукьда.
