7-февралдиз чи арадай бажарагълу шаир, 50 йисалай гзаф девирда муаллимвал авур РД-дин медениятдин лайихлу къуллугъчи, Ватандин ЧIехи дяведин ветеран, орденринни медалрин сагьиб Кьасум Уружевич Фаталиев акъатна. Адан 99 йис тир.
Кь.У.Фаталиев 1924-йисуз Къурушрин хуьре дидедиз хьана. Мектебдилай гуьгъуьниз Дербентдин педагогвилин училище, ДГУ-дин филологиядин факультет акьалтIарна. Яргъал йисара муаллимвал авур Кьасум Фаталиева цIудралди несилриз дерин чирвилерни тербия гана.
Ватандин ЧIехи дяведин йисара далу пата кIвалахна. НКВДдин махсус батальонда къуллугъна. Адаз “Кавказ оборона авунай”, 1941-1945-йисара чIугур зегьметдай медалар гана.
Кьасум Фаталиев лезги эдебиятдин алемда, сифте нубатда, кьетIен хатI авай сатирик яз машгьур тир. Адан сад лагьай шиир гьеле 1942-йисуз чапнай. Шаирдин айгьам, хъуьруьн квай эсерар газетризни журналриз акъатна, цIудралди кIватIалра гьатна. Лезги сатирадин амадагрикай сад яз, адан са шумуд эсер 1952-йисуз акъатай лезги шииратдин антологиядани ава.
Кьасум Фаталиев “Лезги газетдихъ” галаз сих алакъаяр хуьзвай яшлу авторрикай сад тир. Мукьвал-мукьвал адан эсерар газетрин чинра чапзавай. 2001-йисуз Махачкъалада “Хъуьруьхъ, дустар” тIвар алаз акъатай Кь.Фаталиеван ктаб лезги шииратдал рикI алайбуру хушдиз кьабулна.
“Лезги газетдин” редакциядин коллективди, Кьасум Фаталиев рагьметдиз финихъ галаз алакъалу яз, адан хизанриз, вири мукьва-кьилийриз, къелемдин юлдашриз башсагълугъвал гузва. Шаирдин экуь къамат чи рикIера амукьда.
