И йикъара Владимирский областдин Суздаль шегьерда грекринни римлуйрин жуьреда кьуршахар кьунай кьиле фейи Россиядин чемпионатда (ана вири санлай 300-далай виниз спортсменри иштиракна) дагъустанви спортсменри хъсан нетижаяр (къизилдин 3 медаль) къазанмишна. Уьлкведин чемпионатда виниз тир агалкьун къазанмишун спортсменриз Дагъустандин Кьил Сергей Меликовани мубаракна.
ИкI, гила галаз-галаз кьвед лагьай сеферда Милад Алирзаева (87 кг-дин заланвал авайбурун арада, миллетдал гьалтайла, ам рутулви я) чемпионвилин тIвар къазанмишнава. Вири бягьсер ада вахт куьтягь жедалди, 41:0 гьисабдалди акьалтIарна. Чи ватанэгьли машгьур спортсмен, вичин ери-бине Ахцегьай тир Анвар Аллагьяров (60 кг-дин заланвал авайбурун арада) чемпионатда 2-чкадиз лайихлу хьана. Шамил Мусаева (130 кг-дин заланвал авайбурун арада) буьруьнждин медаль къазанмишна.
КьетIендаказ Анвар Аллагьярован (алай вахтунда ам Москвадин патай экъечIзава) акъажунрикай рахайтIа, дугъриданни, ихьтин вахтара амукьзавайди анжах гьайиф чIугун я. Алатай йисузни ам гимишдин медалдиз лайихлу хьанай. И сеферда финалдиз акъатдалди кьиле тухвай вири бягьсер Анвара инанмишвилелди гъалибвал къазанмишуналди акьалтIарна. ИкI, Герман Доев — 7:1, Анзор Карагулов — 10:4, чи ватандаш Мансур Расулов — 11:2, ярумчух финалдани Эмин Сефершаев (Анваран заланвал авайбурун категорияда ам викIегьди яз гьисабзавайди тир) 8:6 гьисабралди адаз кумукьнай. Финалдин акъажунра А.Аллагьярованни Мордовиядай тир Сергей Емелинан бягьс 3:3 гьисабдалди акьалтIна. Амма С.Емелина эхирдай кьиле тухвай приёмди чи ватандашдин гъиляй “къизил” акъудна. Чун инанмиш я, Анвар Аллагьярова ихьтин легьзейрикай тарс хкудда, мадни виликди еримишда. И инанмишвални чаз ада вичи гузва, инал зи фикирда финалдиз акъатун патал бягьсина, ам куьтягь жедалди 5 секунд амаз (“вертушка” приём ишлемишуналди), лап устадвилелди ва инанмишвилелди гъалибвал къазанмишун — вичин къилих къалурун ава.
Рагнеда Рамалданова
