Зенд
2021-йисан 33-нумрадай М.Жалилован “Къиметар хкажзава”, гьа и йисан 41-нумрадай А.Магьмудован “Девирар ва къиметар” макъалаяр кIелайла, зун пагь атIана амукьна. Дугъриданни, югъ-къандавай вири затIарин, иллаки недай суьрсетрин, къиметар цавариз акъатзава. Заз са бязи рекъемрал акъвазиз кIанзава.
Хуьруьн майишатдин кьилин хилер багъманчивал, саларбанвал, малдарвал ва хипехъанвал я. Майишатдин гьар са хиле вичиз хас тир суьрсет гьасилзава. Малдаррини хипехъанри гьасилзавай суьрсетдин къиметар лугьуз тежер кьван кьилинбур я. Чи патара, дуьзенлухра, инсанар багъманчивилел машгъул я. Гзафбуру кьилдин майишатар арадал гъанва.
Колхозар, совхозар лагьайтIа, чи кьиле авай “патриотри” тармарна. Гаф авач! Кьилдин ксаривай чпин 13 сотых чиляй гьикьван суьрсет къачуз жеда кьван?! Дугъри я, жемятдин са паюнив кьван ижарада кьунвай чилерни гва. Жемятди асул гьисабдай гьасилзавайди ичерни шуьмягъар я. Абурун къиметрикай рахайтIа, шаз шуьмягъар 250 манатдай тиртIа, алай вахтунда — 200 манатдай, ичер 4 манатдай кьабулзава. Малдарри, хипехъанри гьасилзавай суьрсетрин къиметар цавариз акъатайла, багъманчийрин суьрсетдин къимет авайвал кьванни амукь тавуна, агъуз аватунин себеб вуч хьурай?!
Гьа и месэладиз талукь са къаравилидикайни кхьин тавуна жедани?
— Я Кефчибег, ви багъда авай ичин тарарин кIанер вири ичер я хьи? Лап юг гатадайвал ава. Вуна абур кIватIна, маса вучиз гузвач? ТахьайтIа ваз хабар авачни? Чи хуьре ичер кьабулдай пункт ахъайнаве-е, кило — 4 манатдай.
— Вуч, вуч? 4 манатдай?
— Эхье-е, 4 манатдай.
— Я Аллагь рази хьайи къунши, за абур 4 манатдай кIватIдаче-е. Гъавурда гьатнани?
— Я чан Кефчибег, бес Аллагьди гайи ризкьи чиле твадани мегер? Ви тарарик кIвахьнавай ичер 1 тонн кьван жеда. Абур маса гайитIа, ваз 4 агъзур манат пул къведа. Адахъ хизандиз гъуьр къачуртIани, са кар я…
— Гъуьруьн пул жеда лугьуз, ваз зун 4 манатдай ичер гваз пунктунал фена кIанзавани? За ахпа а тIвар вутIда? Ичер гьакI барбатI хьуй…
Ингье “базардин алакъайри” къе чи зегьметчи халкь квел гъанватIа… Яраб мад вуч ахквадатIа?..
Фазила Абасова
