Алай йисан 8-февралдиз РД-дин Кьилин ва Гьукуматдин Администрациядин руководитель Алексей Гьасанован регьбервилик кваз коронавирусдин тIугъвал­дихъ галаз женг чIугун патал Дагъустанда кардик квай оперативный штабдин заседанидал регионда авай санитариядинни эпидемиологиядин гьаларикай ва гьакI агьалийриз рапар ягъунин карда медицинадин рекьяй еридин куьмек гуникай веревирдер авуна.

Алексей Гьасанован гафаралди, вири уьлкведа хьиз, республикадани коронавирусдиз талукь гьалар муракаббур, амма гуьзчивал ийиз жедайбур я.

Къейд авурвал, алатай гьафтеда 5 агъзур кас начагъ хьана. Ида, Гьасанова тестикьарайвал, поликлиникайрал гуж акьулдна. И йикъара азар­ха­найра къаткурнавайбурун кьадарни гзаф я. Гьа са вахтунда коронавирусдиз акси ра­пар ягъунин гьерекат яваш хьана. Санлай къачурла, алай вахтунда республикада вакцинация авуна кIанза­вай дагъустанвийрин 60 процентдиз рапар янава. Ихьтин гьалара региондин здравоохраненидин къурулушрин вилик акъвазнавай кьилин везифа начагъбур кьабулдай чарпаяр бес кьадарда жедайвал ва гьа са вах­тунда куьмек гунал студентар — медикарни желб авун я. Гьасанова медицинадин идараяр бес кьадарда улакьралдини таъминарунин пата­хъай лагьана.

Алатай сеферда оперативный штабди вилик эцигай везифаяр кьилиз акъудзавай гьалдикай РД-дин Гьукуматдин Председателдин заместителдин везифаяр вахтуналди тамамарзавай Мурад Къазиева малумат гана.

Гьа вахтунда заседанидал агьалияр вакицинация авунин гьакъиндай табли­гъатдин кIвалах артухаруникай ихтилат фенай. Къе Дагъустанда суткада 15 агъзур касдиз рапар ягъиз жедай вакцинациядин 154 пункт кардик ква. Мобильный 187 бригада тешкилнава. Начагъбур гзаф хьун фикирда аваз, медицинадин идараяр четин шартIара кIвалахдайвал ва гьа са вахтунда алава яз 2 агъзур чарпай гьазурнава. 1967 чарпай кислороддалди таъминарнава.  Ихьтин серенжемрихъ галаз сад хьиз  образованидин идарайра дезинфекциядин кIвалахарни кьиле тухузва.

Региондин Роспотребнадзордин регьбер Николай Павлован гафаралди, къенин юкъуз коронавирусдин цIийи штаммар акатнавайбур 78 агъзур касдиз барабар я. Лап гзаф кьадар инсанар­ 21 му­ниципа­­литетда начагъ жезва. Абурук­ Каспийск, Дер­бент, Махачкъала, Буйнакск, Къизилюрт акатзава. 13 муни­ци­па­ли­тетда гьалар са бубат пайгарбур я.  Ала­тай гьафте­да  начагъ хьайибурун  46 процент 30-59 йисан яшара авайбур ва 26,6 процент 60 йисалай виниз алатнавайбур тир.

Республикадин санитарный кьилин духтурдин гафаралди, ихьтин чIуру гьалар арадал атун эпидемиядиз акси яз тухузвай серенжемрал ва истемишунрал агьалийри амал тавун я. Тестикьарнавайвал, “омикрон” штаммдик начагъ жезвайбур гзаф я. Абурун 30 процент ху­мадин ли­шанар са артух авачиз начагъбур я.

Коронавирусдин цIийи жуьредик начагъбур гзаф хьунихъ галаз алакъалу яз Николай Павлова идарайра, организацийра, инсанар гзаф кIватI жезвай чкайра, об-щественный улакьра маскаяр алукIун давамарун, кIвалахзавай чкайра экуьнахъ фильтрация авун, бедендал ифин алани, алачни ахтармишун герек тирди ихтилатна. ГьакIни экспресс-тестарни тухун давамарна кIанда.

РД-дин здравоохраненидин минис­тр­дин везифаяр вахтуналди тамамарзавай Татьяна Беляевади алава хъувуна хьи, 4-февралдиз 21282 дуьшуьшда инсанар COVID-дик начагъ хьана. Абуру­кай 18,5 агъзур касдив амбулаторийра куьмек агакь­на. Гьайиф къведай кар ам я хьи, абурукай 2,5 агъзур кас аялар я. Алай вах­тунда азарханайра 2927 начагъдав духтуррин куьмек агакьзава. Абурукай гзафбур 60 йисалай алатнавайбур ва гьакI ая­ларни гъилел-кIвачел заланзавай дишегьлияр я. Республикадин медицинадин идарайра алава яз 242 чарпай гьазур­нава.

Т.Беляевади хабар гайивал, республикадиз жаванар патал вакцина хканва. 18 йис жедалди яшарин 226 жавандиз рапар янава. Дагъустанда сад тир кол-центради вичин кIвалах давамарзава ва аниз телефондин 112 нумрадай зенг ийиз жеда. Медицинадин работникриз исятда 1700 волонтердини куьмек гузва.

Хийир Эмиров