Чи ватанэгьлияр — гьар сана
Илимда агалкьунар къазанмишзавай мад са жегьил ватанэгьлидикай чав шад хабар агакьна. 2022-йисан 19-январдиз Москвада Рамиз Ашурбегович Алиева муниципальный праводин кафедрадин рекьяй диссертация хвена, юридический илимрин кандидатдин дережа къачуна. Илимдин рекьяй виликди финин макьсад ада гьеле мектебда кIелай чIавалай вилик эцигнавай.
Р.Алиев 1992-йисан 26-майдиз Дербентда дидедиз хьана. 2009-йисуз шегьердин 11-нумрадин мектеб къизилдин медалдалди куьтягьна. Гележегда юриствилин пеше хкягъуникай виликамаз фикирай Рамиз гьа и йисуз РУДН-дин (Россиядин халкьарин дуствилин университет) юридический факультетдик экечIна ва 2014-йисуз анаг тафаватлудаказ куьтягьна. Гьа ина магистратурада кьве йисуз чирвилер мадни артухар хъувун, гурарин кIарарай хьиз, илимдин кукIушрихъди хкаж хьун кьетIна. Инанмишвилелди камар къачудай къаст рикIевай жегьилди магистратурани тафаватлудаказ куьтягьна. 2016-2019-йисара РУДН-да аспирантурада кIелна.
Инал жегьил алимдин хизандикайни, ери-бинедикайни куьрелди ихтилат тавуна жедач. Адан бубайрин ватан СтIал Сулейманан райондин Курхуьр я. Рамизан буба Ашурбег Рамазановича Дербент шегьердин коньякрин комбинатда кIвалахзава, диде Ирена Максимовнади — Дербентдин ветеринариядин лабораторияда.
Университетда кIелай вахтунда Рамиз чирвилерин, савадлувилин ва агалкьунрин жигьетдай вилик жергейра авай студентрикай тир. Адан агалкьунар гзаф кьадар шабагьар гуналди къейдна, гьа жергедай яз РФ-дин юристрин ассоциациядин чухсагъулдин чарчелдини. КIелунра къазанмишай еке агалкьунрай адаз РФ-дин Президентдин къвалав гвай РД-дин Гьамишалугъ векилдин, РУДН-дин ректордин патайни чухсагъулдин чарар гана. Студентвилин йисара Дагъустан Республикадин Кьилин, В.Туманован тIварарихъ галай, Гь.Махачеван фондунин стипендияр къачуни Р.Алиеван алакьунринни агалкьунрин гьакъиндай шагьидвалзава.
2015-2017-йисара ада РФ-дин общественный палатадин экспертно-аналитический центрада пешекар яз, гуьгъуьнлай 2020-йисалди РФ-дин Федеральный Собранидин Федерациядин советдин аппаратда кIвалахна.
2020-йисалай къедалди РФ-дин илимдин ва кьилин образованидин министерствода, правовой ва государстводин къуллугъдинни кадрийрин сиясатдин департаментра жуьреба-жуьре къуллугърал кIвалахзава. Жегьил алимдин хизанда са хва чIехи жезва.
Чна Рамизаз кIвалахда ва илимдин рекье мадни еке агалкьунар хьун алхишзава.
К.Ферзалиев
