Дагъустанда коронавирусдик ва ОРВИ-дик начагъбурун кьадар садлагьана гзаф хьунихъ галаз алакъалу яз вахтуналди мектебар агализ га­тIуннава. “Мирмол” изданиди республикадин обра­зованидин ва илимдин ­министерстводин пресс-къуллугъди ганвай делилрал асаслу яз хабар гузвайвал, алай вахтунда 12 500 аялди арада мензил аваз (дистанци­онно) чирвилер къачузва. Абуруз 3000-далай виниз муаллимри тарсар гузва.

Мектебар агалнавай муниципалитетрин арада Каспийск, Буйнакск, Къизилюрт шегьерар, Бабаюрт, Буйнакск, Тлярата, Новолак, Ногъай районар ава. Бязи чешмейри хабар гузвайвал, эгер республикада коронавирусдихъ галаз алакъалу гьалар хъсан патахъ дегиш тахьайтIа, маса муниципалитетрани мектебар агалун мумкин я.

Дагъустандин меркезда авай мектебрин 90 классда кIелзавай 2567 аялди арада мензил аваз чирвилер къачуда. Махачкъалада гьелелиг михьиз агалнавай мектебар авач.

«Лезги газет»