Кьасумхуьруьн 2-нумрадин юкьван шко­лада (директор — Муслим  Селимов) “Лезги чIал хуьнин карда лезги чIалал акъатзавай газетрин ва журналрин роль” темадай мярекат кьиле фена. Ам республикадин жемятдинни сиясатдин “Лезги газетдин” 100 ва СтIал Сулейманан райондин “Куьредин хабарар” газетдин 90 йисарин юбилейриз талукьарнавай.

Мярекат школада лезги чIалан ва лите­ратурадин тарсар гузвай тежрибалу муал­лим Пирис Нежведиловади кьиле тухвана. Ана школадин муаллимри ва кIел­­за­вай­буру, журналистри, хуьрерин мух­бир­ри­, райондин образованидин управленидин, информациядинни методический центрадин, районда кардик квай дидед чIа­ла­рин муаллимрин Ассо­циа­циядин, лезги пи­сателрин Союздин райондин отделенидин векилри, газетрин амадагри иштиракна.

Газетрин юбилейриз талукьарнавай мярекат школьникри милли парталар алаз лезги кьуьлер авунилай башламишна.

“Лезги газетдин” тарихдикай, 100 йисан къене ам фейи баркаллу рекьикай, лезги чIал ва аде­тар хуьн патал газетди тухузвай еке кIвалахдикай мярекатдал тежрибалу муаллим Пирис Неж­ведило­ва­ди гегьенш рахунар авуна.

“Куьредин хабарар” газетдикай, жуьреба-жуьре йисара редакцияда ва типографияда кIвалахай журналистрикайни пешекаррикай 40 йисалай виниз газетдин культурадин отделдин заведующийвиле кIвалахзавай журналист ва шаир Абидин Камилов рахана, ада вичин са шумуд шиирни кIелна.

Газетрикай чпин фикирар и цIарарин авторди, муаллимар тир Шамсудин Магьамдарова, Полина Амирхановади, Жа­миля Жигеровади ва масабуру лагьана.

Школьникар тир Марал Улугъаевади­, Диана Балаговади, Алина Жигеровади, Фатима Агьмедовади, Саид Буржумова­ ва масабуру лезги чIалаз, газетриз бахш­навай шиирар хуралай кIелна, манияр тамамарна.

Хазран Кьасумов