23-январдиз Ахцегь райондин Хуьруьгрин хуьре авай образованидин “Люминари” центрада химиядай олимпиада кьиле фена. Ана Кьиблепатан Дагъустандин районрин мектебра 11-классра кIелзавай 28 аялди иштиракна. Мярекатдин тешкилатчи мергьяматлувилин “ЛЕКИ” фонд тир.
2 турдикай ибарат тир олимпиададин нетижайралди, 1-чка СтIал Сулейманан райондин Герейханован хуьруьн 1-нумрадин мектебдин ученица Диана Жалиловади кьуна. 2-чкадиз Кьасумхуьруьн 1-нумрадин мектебдин ученик Эфенди Мегьамедрасулов лайихлу хьана. 3-чка чпин арада Ахцегь райондин Хуьруьгрин хуьруьн мектебдин ученица Хадижат Ражабовади ва СтIал Сулейманан райондин ЦIийихуьруьн мектебдин ученик Ислам Селимова пайна.
КIвенкIвечи чкаяр кьурбуруз фондунин патай дипломар ва 10, 7, 5 агъзур манатдин кьадарда аваз пулдин премияр гана. Дипломриз абурун муаллимарни лайихлу хьана.
Къейд ийин хьи, “ЛЕКИ” фондуни образованидин хилез кьетIен фикир гузва: олимпидаяр, мастер-классар, жуьреба-жуьре рекьерай алимар желб авуналди, мектебра гуьруьшар, конкурсар тешкилзава. Алай йисан мартдин вацра фондуни “Лезги газетдин” редакциядихъ галаз санал Кьиблепатан Дагъустандин районрин мектебра 11-классра кIелзавай аялрин арада лезги чIалайни олимпиада тухудайвал я. ЦIи ам кьвед лагьай сеферда кьиле фида.
«Лезги газет»
