“Куьредин ярар” культурадин центради (регьбер Агьмедпаша Агьмедпашаев) Виридуьньядин шииратдин йикъаз талукьарна Сулейман-Стальский райондин аялрин Яратмишунрин кIвале чIехи межлис кьиле тухвана. Аниз са чи райондай 20-дахъ агакьна, гьакIни къунши Мегьарамдхуьруьн, Хив, Кьурагь Дербент, Къаякент районрай, Санкт-Петербургдай яратмишунардайбур атанвай.
И мярекатда муниципальный райондин кьилин 1-заместитель Лацис Оружева, РУО-дин начальник Къачабег Аминова иштиракна.
Межлис кьиле тухузвайди тир лезги писателрин Союздин райондин отделенидин председатель, шаир Абидин Камилова, межлисдиз атанвайбур тебрик авурдалай гуьгъуьниз, вичи районда кьиле физвай гзаф мярекатра иштиракай шаир, музыкант ва манидар ашарви Гьуьсейн Рамазанов ва гьакIни шаир, публицист, хъсан руководитель ахцегьви Абдулрашид Рашидов чи арадай акъатнавайди малумарна ва абурун экуь къаматар рикIел хкун яз, кIвачел къарагъна, са декьикьада кисна акъвазун тIалабна.
Межлис шаир СтIал Мислиматан Яран сувар тебрикзавай “Вун хвашкалди!” шиирдилай ачухна.
Сифте гаф райадминистрациядин кьилин 1-заместитель Лацис Оружеваз гана. Ада вичин ва райондин кьил Нариман Абдулмуталибован патай залда авайбуруз районда малумарнавай Эминан йисан сергьятра аваз кьиле тухузвай шииратдин межлис ва Яран сувар мубаракна, вирибурухъ уьмуьрда ва яратмишунра еке агалкьунар хьана кIанзавайди лагьана.
Тебрикдин хуш келимаяр гваз межлисдал РУО-дин начальник Къачабег Аминов, Кьурагь райондай атанвай шаир Сейфудин Шагьпазов, чкадин шаирар Шагьабудин Шабатов, Соня Ибрамхалилова, Ражаб Исмаилов, Бугъдатепедай тир Ширинагъа Сулейманов, писателар Нажмудин Шихнабиев, Марал Базаева, Назифа Юркъулиева, чпи кхьенвай шиирар гваз са десте школьницаяр, гьакIни Санкт-Петербургдай хтанвай багьа мугьман, бажарагълу шаир, чи ватанэгьли Гуьзеля Гьасанова ва масабур рахана. И межлисдиз яргъал тир Голландиядай тел яз рахкурнавай чи районэгьли шаир Гуьлжагьан Мисрихановадин тебрикдин чIални кIелна, вирибуруз Яран сувар мубаракна, яратмишунин рекье виридахъ агалкьунар хьана кIан-завайди малумарна.
Эхирдай “Куьредин ярар” культурадин макандин регьбер Агьмедпаша Агьмедпашаева мярекатда активвилелди иштиракай, вирибуруз сагърай лагьана, са жерге юлдашрив “Куьредин ярар” макандин гьуьрметдин грамотаяр, савкьатар, чи шаиррин ктабар вахкана.
Куьре Абид
