27-декабрдиз СтIал Сулейманан райондин собранидин депутатрин сессиядин заседание кьиле фена. Ам райондин собранидин председатель Штибег Мегьамедханова кьиле тухвана. Сиясатдин мярекатда РД-дин Халкьдин Собранидин депутат Имам Яралиева, РД-дин Кьилин къенепатан сиясатдин ва идара авунин рекьяй управленидин отделдин начальник Адам Мамаева, гьа и отделдин консультант Рустам Нефтелиева ва РД-дин Кьилин правовой управленидин отделдин начальник Шамил Эмиргьамзаева, профессор Гьамидуллагь Мегьамедова, райондин прокурор Межид Велимурадова, депутатри ва райондин идарайрин кьиле авай ксари иштиракна.
Заседанидал гьялай кьилин месэла СтIал Сулейманан райондин муниципалитетдин кьил хкягъун тир. Сессиядал кьве касдин — Нариман Абдулмуталибован ва райондин кьилин экономикадин месэлайрин рекьяй заместитель Саид Темирханован кандидатураяр гъанвай. Къейд ийин хьи, кьве кандидатдихъни кIвалахдин гзаф йисарин тежриба, агьалийрин арада гьуьрмет, авторитет ава. Сес гудалди вилик С.Темирханова вичин кандидатура алудна. Депутатри рейсадвилелди Н.Абдулмуталибоваз сес гана. Гьа икI, СтIал Сулейманан райондин администрациядин кьилин къуллугъдал пуд лагьай сеферда Нариман Шамсудинович Абдулмуталибов хкя хъувуна.
Лугьун лазим я хьи, Н.Абдулмуталибова кIвалахай йисара районди халкьдин майишатдин саки вири хилерай виликди камар къачуна. “Лезги газетдин” редакциядин коллективди Н.Абдулмуталибоваз къуллугъдал хкя хъувун мубаракзава ва район патал чIугвазвай зегьмет бегьерлу краралди лишанламишдай агалкьунар хьун кIанзава.
«Лезги газет»
