И йикъара Нальчик шегьерда самбодай кьиле фейи СКФО-дин чемпионатда Дагъустандин хкянавай командадик кваз иштиракай кьегьалри вири санлай — 9, абурукайни къизилдин 5 медаль къазанмишна…
И акъажунра вичин ери-бине Ахцегь райондай тир, алай вахтунда Каспийскда яшамиш жезвай Завир Гьажиева (58 кг-дал къведалди заланвал авайбурун арада) 1-чка кьуна. Идалди ада неинки къведай йисан мартдиз Екатеринбург шегьерда кьиле фидай Россиядин чемпионатдиз путёвка къазанмишна, гьакIни 18 йиса аваз чи кьегьалди самбодай спортдин мастервилин тIварни къачуна.
РикIел хкин: эхиримжи пуд гьафтеда Завира са шумуд акъажунра вичин гьунарар ва устадвал къалурна. ИкI, ада Каспийскда, Али Алиеван тIварунихъ галай спортдин Дворецда, кьиле фейи Дагъустандин чемпионатдани, 18 йисал къведалди яшара авай жегьилрин арада кIвенкIвечивал патал акъажунрани 1-чкаяр кьуна.
Чи мухбир
