“Лезги газетдин” 2020-йисан 33-нумрадиз “Зиди туьгьмет туш” тIвар алай зи макъала акъатнай. Ана Кьурагь райондик акатзавай чи къуншидал алай Кьуьчхуьррин хуьруьз Мегьарамдхуьруьн райондин ЦIийихуьряй физвай рекье асфальт авачирдакай, ам къайдадик квачирдакай ва рекьин къерехра инсанри гадарзавай зирзибил авайдакай ихтилат физвай.
Кьуьчхуьр Саидан несилар яшамиш жезвай хуьруьхъ са жуьрединни нукьсанар тахьун лазим я. Пайгардик квачир рекьяй физвай инсанрини, автомашинар гьалзавайбуруни рехъ къайдадиз гъуник умуд кутунвай. Къунши хуьре чахъ мукьвабурни, чирхчирарни ава. Кьуьчхуьрвияр пара гьуьрметлу, зегьмет чIугвадай инсанар я. Гьар сеферда Кьуьчхуьриз фидайла аквазвай гьалари рикIиз тIарвал гузвай. Зани хъсанвилихъ дегишвилер жедайдак умуд кутунвай. ИкI хьунни авуна. Нубатдин сеферда аниз фидайла акуна: рекье къир цанва, къерехар михьи я.
Кьуьчхуьрвийривай чир хьайивал, хуьруьн администрациядин кьил Аскер Жабраилов рехъ къайдадиз гъунин къайгъуйрик кваз кьвед-пуд йис тир. И карда адаз Кьурагь райондин муниципалитетдин кьил Замир Азизова ва и райондай хкянавай депутат Сейфуллагь Исакьова куьмекна, герек кьадар пулдин такьатар бюджетдик кутуна. Нетижада месэла гьялна. Хуьруьнвийрини, рекьяй физвай инсанрини, машинар гьалзавайбуруни абуруз сагърай лугьузва. Къуй чи халкьдин чIехи шаирдин тIвар алай макан генани абад хьуй!
Къведай йисуз Кьуьчхуьр Саид дидедиз хьайидалай инихъ 255 йис тамам жезва. Юбилейдиз талукь мярекатарни тахьана амукьич. Хуьруьз инай-анай мугьманарни хтун мумкин я. Кьуьчхуьрвийрин вилик мадни жавабдар везифаяр акъвазнава: ЦIийи Макьарихъ, шегьредихъ физвай рехъ къайдадиз хкун, Гуьлгери вацIал алай муьгъ ремонт хъувун. Хуьруьн агьалийри гьарда вичивай жедай кIвалахар авунва, а рекьиз чиргъ вегьена, чпин тракторралди са жуьре машин фидайвал туькIуьрнава. Заз чиз, и кардик хуьряй акъатнавай мумкинвилер авай рухвайрини рушари ва Кьуьчхуьр Саидан яратмишунрал ашукь ватанэгьлийри чпин пай кутада, гьакI хуьруьн ва райондин регьберрин куьмекни галаз.
Тамила Салманова
