Мегьарамдхуьруьн районда 19-23-мартдиз «Йисан тербиячи – 2018» республикадин конкурсдин муниципальный пай кьиле фена. И гьакъиндай «Лезги газетдиз» Мегьарамдхуьруьн райондин администрациядин пресс-къуллугъди хабар гузва.

Мектебда кlелдай вахтунилай вилик квай образованидин идарайра кlвалахзавай муаллимрин пешедин машгьурвал хкажунин, бажарагълу тербиячияр винел акъудунин макьсаддалди тухузвай конкурсда Мегьарамдхуьруьн райондин аялрин ругуд бахчада кlвалахзавай тербиячийри иштиракна.

Конкурс са шумуд паюникай ибарат тир. Гьар са иштиракчиди вичихъ авай алакьунар, тежриба къалурна.

Нетижада жюридин дестеди 1-чка Мегьарамдхуьруьн «Солнышко» аялрин бахчадин тербиячи, социальный педагог Эльвира Насрединовадиз, 2-чка Советский хуьруьн «Красная шапочка» аялрин бахчадин физкультурадин инструктор Анарира Гьабибовадиз ва 3-чка Советский хуьруьн «Ласточка» бахчадин тербиячи Фатlимат Бирембеговадиз гана.

Нетижаяр кьурдалай кьулухъ иштиракай тербиячийрив грамотаяр, пишкешар вахкана.

Гъалиб хьайи Эльвира Насрединовади Мегьарамдхуьруьн райондин патай конкурсдин республикадин паюна иштиракда.

«Лезги газет»