Лезги халкьдихъ, яратмишунин рекьяй чlехи алакьунар авай шаирар, гьикаятчияр, музыкантар хьиз, гзаф кьадарда художникарни ава. Заз чиз, бажарагълу художникдин яратмишунрал гьейран тежедай инсанар бажагьат жеда. Абуру чlугун­вай шикилриз, суьретриз килигуналди тух жедач! И йикъара зун вичиз кьетlен алакьунрин пай ганвай художник  Фаргьад  Дамирбегович  Беговахъ  галаз таниш хьана.

Ам 1966-йисан 3-ноябрдиз Кцlар райондин Чипир хуьре дидедиз хьана. Адан буба Дамирбега “Чипир-Жакар” цин къаналдин фяле яз кlва­лахзавай. А девирдин саки вири инсанар хьиз, абур кесибвиле яшамиш хьана. Фаргьадан диде-бубадиз чпин аялар образование авайбур, савадлубур хьана кlанзавай. Гьа­виляй Фаргьад мектебда лап хъсандиз кlелиз алахъна. Фаргьад Бегова къейдзавайвал, хъсандаказ шикилар чlугваз алакьзавайдакай адаз 3-классда авай чlавуз малум хьана. Бажарагъдин сифте цlирер пайда хьайи аял къелемдин куьмекдалди гележегда вичин алакьунар мадни вини дережадиз акъудунал машгъул хьана. 5- класс­диз акъатайла, классдин руководителдин тlалабу­н­ал­ди, ада мектеб патал альбомар гьазурнай. Мектебда кlелдай вахтунда ада хейлин шаиррин, машгьур ксарин шикилар чlугуна. Мектеб куьтягьайдалай кьулухъ ам Сумгаит шегьердин политехнический техникумдик экечlна. Вичи хиве кьазвайвал, ана кlелун адаз бегенмиш хьанач, гьавиляй ам, хиве авай пак буржи тамамариз, армиядиз фена. Ракетайрин кьушунра къуллугъай вахтундани ада, вичин бажарагъ хъендик тун тавуна, шикилар чlугваз хьана.

Армияда къуллугъна куьтягьайдалай кьулухъ Ленинград шегьердиз атана­ ва Репинан тlварунихъ галай ху­до­же­­ствен­ный академияда кlел­на. Ина Фаргьадан вилик яшамиш жедай чкадин ме­сэла акъвазнавай. Ма­са мумкинвал тахьайла, ам гьа са вахтунда харат устlарвилин пешедин рекьяй махсус училищедикни экечlна.

1992-йисуз, сифте сеферда яз, Польшада Ф.Бегован шикилрин выставка хьана. Гуьгъуьнлай ада вичин алакьунар дуьньядизни къалурна. Художникди Туьркияда, Парижда, Болгарияда, Румынияда, Чехословакияда, Венгрияда зегьмет чIугуна. Адан гзаф кlвалахар дуьньядин саки вири пипlера — Америкада, Англияда, Германияда, Францияда, Китайда, Австралияда ва масанра хсуси коллекцийра ава. Бажарагълу лезгидин яратмишунра гзаф чка портретри кьазва. Алай вахтунда ам искусстводин жуьреба-жуьре жанрайрал, кьилди къачуртlа, реализмдал, сюрреализмдал, абстракциядал  машгъул я.

Фаргьад Бегов “Санкт-Петербургдин ху­дожникрин кlватlал” тlвар алай ком­мер­циядинди тушир тешкилатдин предсе­дателдин заместитель, Париждин азад художникрин дестедин, Москвада урус художникрин союздин член я. Б.Фаргьа­да­н­ яратмишунрихъ галаз Интернетдай ­та­ниш жедай мумкинвални ава.

Ватанэгьлидиз вичин хайи ватан тир Кцlа­ра выставка тешкилдай ни­ят ава. Къуй адан вири къастар кьилиз акъат­рай!

Гьазурайди — Куругъли Ферзалиев