“Лезги газетдиз” Дагъустандин культурадин министерстводин пресс-къуллугъди хабар гайивал, Москвада авай Б.Щукинан тIварунихъ галай театрдин институтди къведай йисуз лезги актерар гьазурдай студия ахъайдайвал я. Театрдин институтдин ректор Евгений Князеван гафаралди, вузда жуьреба-жуьре йисара гзаф кьадар дагъустанвийри кIелна.
“Исятда чна Лезгийрин СтIал Сулейманан тIварунихъ галай госмуздрамтеатрдиз артистар гьазурун патал абитуриентар кьабулзава. И кIвалах театрдихъ галаз сих алакъада аваз кьиле тухуда. Чна алакьунар авай, чпин мумкинвилер театрдин искусствода ахтармишиз кIанзавай лезгийриз чи студиядик экечIун теклифзава”, — къейдна К.Князева.
Уьлкведин кьилин вузрикай сад тир Б.Щукинан тIварунихъ галай театрдин институтда ахъайнавай лезги студиядиз чпин яшар 17 йисалай тIимил тушир 10 кас кьабулда. Чирвилер “Актервилин искусство” пешекарвиляй гуда. И карди милли театрдиз жегьил къуватар кьабулдай мумкинвал гуда.
«Лезги газет»
