Сейфуллагь Керимован — 100 йис 

Дагъустандин музыкальный культура вилик тухуник еке пай кутур­ чи баркаллу районэгьли, РСФСР-дин искусствойрин лайихлу деятель, ДАССР-дин халкьдин артист, маш­гьур­ композитор Керимов Сейфуллагь Асадуллаевич дидедиз хьайидалай инихъ 100 йис тамам хьуниз — лишанлу вакъиадиз талукьарна, алатай гьафтеда Ибадуллагь Тагьирован тIварунихъ галай райондин куль­ту­радин дараматдин чIехи залда еке мя­рекат кьиле фена. Ам СтIал Сулейманан райондин культурадин отделди аялрин му­зы­кальный школадин коллективдихъ галаз санал тешкилнавайди тир.

Мярекат Россиядин халкьарин адетдин культурадин центрадин директордин заместитель, Дагъустандин культурадин лайихлу работник Ярагьмед Ярагьмедова ачухна ва кьилени тухвана­.

Машгьур композитордин уьмуьрдин ва яратмишунрин рекьикай  аялрин музшколадин муаллим Наила Мегь­т­ихановади куьруь суьгьбетна.

Ахпа сегьне ДМШ-дин муаллимрин ва аялрин ихтиярда туна. Аялрин хорди “Дагъустандин дагълар” мани (дирижер — Расул Абдулкебиров) устадвилелди тамамарна. С.А. Керимова кхьенвай лезги халкьдин авазрикай ибарат тир попурри ДМШ-дин халкьдин алатрин ансамблди (дирижер — Мусаиб Сейфуллаев) рикIера шад гьиссерив лепе гуз тадайвал тамамарна­.

И цIарарин авторди композитордин 100 йис тамам хьуниз талу­кьарна кхьенвай “Куьредин билбил” шиир Амрина Наврузалиевади устадвилелди кIелна. Аялрин дестеди (квартетди) тамамарай “Къизилдин зул” (шаир Сажидин) мани, С.Керимова Алирза Саидован чIалариз кхьенвай “Фатима” Динара Абдулазизовади тамамарна,  гьакIни и школадин муаллим Расул Абдулкебирова лагьай (шаир — Забит­ Ризванован чIалариз мани теснифайди —  гьевескар композитор Майина Аб­дулмуталибова я)  “Ша лагь на ярдиз” мани еке хушвилелди кьабулна­.

Райондин культурадин отделдин гьевескар артистри чIехи композитордин 100 йисан юбилейдиз бахшнавай шадвилин мярекат мадни гурлу авуна.

Абидин  Камилов,

РД-дин культурадин лайихлу работник