Дагъустан Республикадин здравоохраненидин министр Татьяна Беляева тlугъвалдин вилик пад кьунин мураддалди коронавирусдиз акси рапар язавай гьал ахтармишун патал Дербент, Дагъустандин Огни шегьеррин ва Дербент райондин медицинадин идарайриз фена.

Малум хьайивал, Дербент шегьерда ва районда  COVID-19 тIугъвалдиз акси рапар язавай пунктарилай гъейри, Салманан куьчеда авай алишверишдин “Плаза” центрада са пункт мад ахъайнава. Гьакlни Дербент райондин центральный больницадин кьилин духтурдал ана са пункт мад ачухун тапшурмишна. Гьа икl, алай вах­тунда шегьерда ва районда агьалийрин сагъламвал тlугъвалдикай хуьз, тади гьалда ва ха­та­сузвал авачиз рапар ядай цlуд пункт кардик ква.

Т.Беляева шегьердин кьилин больницадиз ва Падардин участковый  больницадин ковид-стационардиз фена. Медицинадин кьве идарани начагъбурай ацlанвай. “Здравоохраненидин модернизация” программадин бинедаллаз, диагностика авун ва начагъбур сагъарун патал кьве больницани санитариядин алава автотранспортдалди гужлу авунва.

“Дербент Дагъустандин кьиблепатан форпост я. Ина яшамиш  жезвай, гьакIни, чка дегишариз, датlана  инсанар къекъвезвайди (миграционные потоки) фикирда кьуналди, Дагъустандин кьиблепатан агьалийрин хатасузвал тlугъвал­дикай хуьн чна лап важиблу яз гьисабзава, — къейдна Татьяна Беляевади. — Республи­када ко­ронавирусдиз акси рапар ягъиз кlанза­вай­бурун кьадар, гьа жигьетдай яз, яшлубурни, гзаф жезва, — давамарна ада. — Иниз килигна, сагъламвал хуьдай карханайри четин шартlара гьа­­къисагъвилелди кlвалахзаватlани, и кар явашарна виже къведач».

Винидихъ къейднавайвал, и юкъуз министр Дагъустандин Огни шегьердиз фена, ана сагъламвал хуьдай идарайра агьалийриз тIугъ­вал­диз акси рапар язавай гьал ахтармишна.

Къагьриман Ибрагьимов