Дагъустандин здравоохраненидин министр Татьяна Беляевади алатнавай ял ядай йикъарин нетижаяр кьуна. Идакай министерстводин сайтда хабар ганва. “Сифте нубатда лугьуз кIанзава, чавай коронавирусдин садакай масадак акатдай азардихъ галаз алакъалу тир эпидемиологиядин гьалар нетижа кьазвайдалай виликан гьафтеда авайвал саки хуьз алакьна: цIийиз азар акатайбурун ва азарханайра къаткурайбурун кьадар са тIимил артух хьана.
Виридалайни кьилинди, и йикъара чалай 63,5 агъзур касдиз азардиз акси рапар ягъиз алакьна. Вакцинация кьиле физвай саягъдал гьалтайла, им йигиндаказ виликди фин я. Амма чна и йигинвал квадар тавунайтIа, хъсан жедай. И кардиз, гьелбетда, QR-кодар кардик кутуни куьмекна. Амма чун QR-кодрихъ галаз яргъалди яшамиш хьана кIандайдан гъавурда акьуна кIанда: къунши регионриз ва абур гвачиз ахъайзавачир и ва я маса чкайриз фин патални абур герек къведайди фикирдай акъуд тавун важиблу я. Гьавиляй адетдин уьмуьр тухун патал чна, инсандин сагъламвал хуьнин месэладал амална, азардиз акси рапар яна кIанда. Иллаки чIехи яшара авай инсанриз артух фикир гун лазим я. Къейд авун лазим я хьи, исятда кIвачел залан дишегьлийризни (ибур чпин къайгъударвал екез чIугуна кIанзавайбур я), кIвачел залан тир вахт 22 гьафтедилай алатайла, коронавирусдиз акси рапар ядай ихтияр ава.
Вакцинациядин пунктари ял ядай вири йикъара адетдин къайдада кIвалахна, гьич садани чпин кIвалах акъвазарнач. Вакцина республикада авазва — адан кьадар 200 агъзур дозадилай (иник са шумуд жуьре ква) виниз я. Са бязи пунктара “Спутник Лайт” вакцинадин кьитвал авай, амма ам алава яз ачухнавай вири пунктара шегьеррин ва районрин поликлиникайра ава. Лугьуз кIанзава хьи, “Спутник Лайт” сифте нубатда кьвед лагьай раб язавай ва 6 вацралай артух вахт вилик COVID-19 тIугъвалдикди азарлу хьайи ксариз язава.
Уьлкведин амай регионра хьиз, чинани аялрин арада коронавирусдикди азарлу жезвайбурун кьадар артух жезва. Алай вахтунда аялар коронавирусдиз акси раб язавай категориядик акатзавач, гьавиляй ОРВИ-дин сифтегьан лишанар малум хьанмазди, аялрик и азар акатунин лишанар гьахьтинбур я, ам мектебдиз ва аялрин бахчадиз ракъурун лазим туш, гьасятда духтурдиз кIвализ эвер це. Исятда Махачкъаладин вири поликлиникайриз COVID-19 тIугъвал квани-квачни чирдай экспресс-тестер агакьарнава, мукьвал вахтунда абур районризни рекье твада. Ида чаз ОРВИ COVID-19 тIугъвалдикай чара ийиз куьмекда, идахъ галаз сад хьиз, азар чукIун тавун патал лазим серенжемарни гьасятда кьабулдай мумкинвал гуда, гьа гьисабдай яз — аялрин арадани”.
«Лезги газет»
