Дагъустандин вузра, мектебра яргъал мензилда аваз (дистанционное обучение) кIелунин къайда гьелелиг кардик кутадач. Идакай накь коронавирусдин вилик пад кьун патал республикада кардик кутунвай Оперштабдин Махачкъалада кьиле фейи заседанидал хабар гана.
РД-дин Кьил Сергей Меликова малумарайвал, тIугъвалдал гъалибвал къачуз хьанвач, цIийи штаммар пайда жезва. И кардихъ галаз алакъалу яз уьлкведин гзаф регионра лап кIеви серенжемар кьабулзава, сергьятвилер тайинарзава.
“Бязи регионра кIвалах тийидай йикъар давам жезва, образованидин идарайра яргъал мензилда аваз кIелзава. Дагъустанда гьелелиг ихьтин серенжемар кьабулунин лазимвал авач. Эгер гьалар пайгардикай хкатайтIа, маса чара амукьдач. Коронавирусдихъ галаз алакъалу яз кардик кутазвай вири серенжемрикай виликамаз хабар гуда.
Республикадин кьилевайбуруз агьалийрин уьмуьрда манийвилер твадай ният авач. Гьа са вахтунда чаз виридаз чир хьана кIанда: азарханайра, кIвалин шартIара агъзурралди инсанри коронавирусдихъ галаз женг тухузва. И тIегъуьндик гьар юкъуз инсанар телеф жезва”, — къейдна Сергей Меликова.
«Лезги газет»
