10-ноябрдиз Махачкъалада РД-дин Кьил Сергей Меликован регьбервилик кваз коронавирусдин вилик пад кьунин жигьетдай кардик квай Оперштабдин нубатдин заседание кьиле фена. Адан сергьятра аваз республикада тIегъуьндихъ галаз алакъалу гьалар, тIугъвалдин нубатдин лепедин вилик пад кьун патал кьабулдай алава серенжемар, азарханаяр бес кьадарда дарманралди таъминарун, коронавирусдиз акси рапар ягъун, тIегъуьндик начагъ хьанвайбуруз медицинадин рекьяй ийизвай куьмекдин еридин маса месэлаяр веревирдна.
Сергей Меликова къейд авурвал, санлай къачурла, Дагъустанда авай гьалар къурху кутадайбур туш. Эхиримжи 7 йикъан къене республика Урусатда коронавирус акатзавай виридалайни тIимил азарлубур авай 6 региондин арада ава. РД-дин Кьили гьисабзавайвал, архайин хьанани виже къведач. Коронавирусдик начагъ жезвайбурун кьадар сагъ хъжезвайбурулай гзаф я.
Эхиримжи йикъара Дагъустанда коронавирусдиз акси рапар язавайбурун кьадар садлагьана гзаф хьанва. Тек са гьафтедин къене абурун кьадар 63 агъзурдалай алатнава. Виликдай ихьтин рекъемар вацран нетижаяр кьадайла жезвай. С.Меликован фикирдалди, рапар язавайбурун кьадар артух хьун QR-кодар кардик кутунихъ галаз алакъалу я. РикIел хкин, октябрдин эхирра, уьлкведин са шумуд регионда хьиз, чи республикадани са жерге идарайриз фин патал коронавирусдиз акси раб янавайди тестикьарзавай QR-код къалурун чарасуз шартI яз тайинарна. И кар инлай кьулухъни къуватда амукьзава.
«Лезги газет»
