ЦIи 2022-йис патал хайи чIалал акъатзавай газет кхьинин сергьятра аваз малумарай “Лезги газет” — гьар са кIвализ” серенжемдик къуьн кутур сад лагьай кас Абдулбеган хва Васиф Гьасанов я.
Васиф Гьасанов яргъал тир Ярославль шегьерда лезгивал, чи чIални меденият хуьзвай стхайрикай сад я. Ина дагъустанвийрин иштираквал аваз кьиле физвай гьар са мярекатдик адан чIехи пай ква. Идалайни гъейри, чи ватанэгьлиди лезги халкьдин жемиятдин уьмуьрдани иштиракзава.
Васиф Гьасанов КцIар райондин Жагьар-паласа хуьре дидедиз хьана. Адан чIехи бубаяр Къурушрин хуьряй я. Жагьар-паласа хуьр арадал гъайибурни, чи ватанэгьлиди тестикьарзавайвал, къурушвияр я.
“Лезги газет” — гьар са кIвализ” серенжемдик вичин пай кутуналди, Васиф Гьасанова вичин бубайрин Ватанда — Докъузпара райондин Вини Къурушрин хуьревай вири агьалийриз (92 хизандиз) 2022-йис патал хайи газет кхьенва. 81 агъзур манатдин кьадарда аваз пулдин такьатар ада чи редакциядив агакьарна.
“Лезги газетдин” редакцияди Васиф Абдулбеговичаз лезги чIал хуьник еке пай кутунай сагърай лугьузва!
«Лезги газет»
