Алатай гьафтеда Махачкъалада, Дагъустандин информациядин ва печатдин министерствода, мукьвара чи республикадин меркезда, илимдинни сагъламвилин “Дурнаяр” комплексда, “Халисан Дагъустан” лишандик кваз кьиле тухвай жегьилрин ватанпересвал хкаждай туризмдин слётдин нетижаяр кьуниз талукьарнавай пресс-конференция хьана. Анал “Е.Гвоздеван тIварунихъ галай елкенрин спортдин федерация” РОО-дин исполнительный директор Мухтар Омарова, слётдин директор Рустам Гьамидова ва арт-директор Казбек Якьубханова журналистриз форумдикай, адан макьсаддикай, программадикай, иштиракчийрикай суьгьбетна…
ИкI, Р.Гьамидова къейд авурвал, серенжемдин кьилин макьсад Россиядин жегьилар чи республикадин медениятдихъ ва адетрихъ галаз танишарун, абуруз “Халисан Дагъустан” къалурун тир. Гьавиляй форумдин тешкилатчияр программа туькIуьрунив рикI гваз эгечIнавай. Аник Дагъларин уьлкведин кьетIенвилерикай сад тир агьалийрин мугьманпересвал къалурун, тIебиатдин гуьрчег чкайрихъ галаз танишарун ва цIийи дустар арадал гъун квай. Мугьманрин гафаралди, слётда иштиракун патал Россиядин 50 региондай 500-далай виниз жегьилрилай арзаяр атанвай. Абур хкядайла чIехи фикир ватанпересвилин ва туризмдин проектриз гузвай.
Мухтар Омарова къейд авурвал, проект теклифайди Дагъустан Республикадин елкенрин спортдин федерациядин ватанпересвилин тербиядин рекьяй отдел (начальник — Рустам Гьамидов) тир. Слётдин программадик, винидихъ къейднавайвал, са шумуд хел квай: край чирун, ватанпересвилин тербия гун ва туризм. ИкI, ватанпересвилин тербия гун Россиядин машгьур гьуьлерал сиягьатчи Евгений Гвоздеван экуь къаматдиз бахшнавай. Форумдин иштиракчийриз адаз талукьарнавай фильм къалурна, гьакIни выставкадихъ галаз танишарна.
Форумдин программадикай мадни гегьеншдаказ Казбек Якьубханова суьгьбетна.
— Программа иштиракчийрин фикир желбдайвал, итижлудаказ туькIуьрнавай: Дагъустандин машгьур векилрихъ галаз гуьруьшар кьиле тухузвай, жуьреба-жуьре арт-майданар тешкилнавай, республикадин туриствилин машгьур чкайриз фидай мумкинвал авай. Сад лагьай юкъуз, слёт ачухунин сергьятра аваз, чна иштиракчияр Дагъустандин медениятдихъ галаз танишарна. Гуьгъуьнин юкъуз СКФО-дин мугьманпересвилин индустриядин сад тир милли Союздин векилри, экспертри жуьреба-жуьре къуллугъар кьилиз акъудуникай (кьилди къачуртIа, жуван бизнес арадал гъуниз, яшайишдин къуллугъар кьилиз акъудуниз талукь яз ва икI мад) суьгьбетна. Маса майдандал машгьур ксарихъ галаз, кьилди къачуртIа, РФ-дин Госдумадин депутат Абдулгьаким Гьажиевахъ галаз гуьруьш тешкилна. Аниз Олимпиададин кьве сеферда чемпион Абдулрашид Садулаев, РД-дин милли сиясатдин ва диндин крарин рекьяй министрдин заместитель Мурад Шафиев атана. Арт-майданрин кIвалахдикай рахайтIа, ДАССР арадал атана 100 йисан юбилейдиз талукьарна, заргаррин ва хъенчIин къапарин сеняткарвилерай мастер-классар къалурна. Мугьманриз заргаррин сеняткарвилиз талукь яз кьетIен проектдихъ (Россияда ахьтинди мад авач) — бедендин мумкинвилер сергьятламиш хьанвай инсанриз и пешедай чирвилер ва вердишвилер гунихъ — галаз таниш жедай мумкинвал хьана. Вичин тIвар Дагъустандилай къецени машгьур тир Шамхал Алиханова итимрин парталрин коллекция къалурна. Амни вири иштиракчийри еке итиждивди къаршиламишна. Слётдин иштиракчийриз адан гъиликай хкатнавай парталар алаз дамахардай мумкинвални авай. Программадин и пай “Лезгинка” ансамблди мадни гурлу авуна, — алава хъувуна ада.
Слётдин пуд лагьай йикъакай Р.Гьамидова суьгьбетна:
— И югъ виридалайни итижлуди хьана. Слётдин иштиракчияр чIехи кьве дестедиз пай хьана: са десте — Чиркейдин цин гьамбарханадал, Сулакдин дагьардиз рекье гьатна, муькуьдини — Дербентдиз. Абур Нарын-къеледихъ, “Лунь” экранопландихъ ва шегьердин маса итижлу объектрихъ галаз таниш хьана, — къейдна ада.
Эхирдай журналистрин суалриз жавабар гунихъ галаз сад хьиз, мугьманри и серенжем лайихлу дережада аваз кьиле тухуз куьмекар гунай Дагъустандин кьиле авай ксариз ва Махачкъаладин администрациядин векилриз сагърай лагьана.
Рагнеда Рамалданова
