Дагъустанда коронавирус акатнавайбур патал кардик кутунвай чарпайрин кьадар артухардайвал я. Идакай республикадин здравоохраненидин министрдин везифаяр вахтуналди тамамарзавай Татьяна Беляевади хабар гана. Къейд ийин хьи, алай вахтунда региондин азарханайра чарпайрин кьадар 2 агъзурни 800-лай алатнава.

Т.Беляевади лугьузвайвал, 25-октябрдин рекъемралди, республикадин азарханайра коронавирус ва стIалжем акатнавай 2346 кас сагъар хъийизва. Абурукай 48 — аялар, 40 кIвачел залан дишегьлияр я. Реанимациядин отделенийра 153 азарлуди ава. ТIегъуьн акатнавайбурукай 717 касди медицинадин кислороддин куьмекдалди нефес къачузва.

Эхиримжи пуд гьафтеда Дагъустанда йикъан къене сагъ хъжезвайбурулай начагъ жезвайбурун кьадар гзаф я. Асул гьисабдай тIегъуьндин есирда гьатзавайбур чпин яшар 60 йисарилай алатнавайбур я.

Къведай гьафте ял ядайди яз малумарнава. Амма и йикъара республикадин са жерге идарайри адетдин къайдада кIвалахда. Абурун арада коронавирусдиз акси рапар ядай пунктарни ава.

«Лезги газет»