Халиф гъавурда туна
Са сеферда Аббасидрин халиф Мансур Даванигиди вичин везир Раби ибн Юнисаз лагьана: “Эгер кьиникь авачиртlа, дуьнья гьикьван иерди жедайтlа!”. Везирди наразивал къалурна: “И дуьньядин вири хийир кьиникьа ава”. Халифди тажубвилелди хабар кьуна: “Вун квекай рахазва?”.
Везирди гъавурдик кутуна: “Эгер кьиникь авачиртlа, къе вакай халиф жедачир (яни, эгер идалай вилик хьайи халиф кечмиш тахьанайтlа, гьукум вал гьалтдачир)”.
Дамахсузвал
Нежефа кlелун куьтягьна, Шейх Аббас Гуми вичин ватандиз хквезва ва ктаб кхьизва. Анжах ада дамахсузвиляй ктабдин автордин еринда вичин тlвар къалурзавач. Чапдай акъатайдалай кьулухъ Гуми яшамиш хьайи шегьерда и ктаб машгьур жеда. Вязер кlелзавай насигьатчийрикай сада гьар юкъуз нисинин капl ийидалди вилик кlватl хьанвайбуруз и ктабдай са бязи чlукар кlелзавай. Насигьатчидин вязерихъ гьамиша яб акалзавайбурун арада Шейхинин бубани авай.
Са сеферда капl авурдалай кьулухъ Шейх Аббасан буба кlвализ хквезва ва хциз лугьузва: “Хва, заз вакайни алим хьана, минбардал хкаж хьуналди, къе а насигьатчиди кlелай ктаб инсанриз кlелна кlанзава. Зун лагьайтlа, дамахдивди ваз килигдай”. Шейх Аббас акьван дамахсуз, лавгъасуз тир хьи, гьатта бубадин и гафарилай кьулухъни ада и ктабдин автор вич тирди лагьанач.
Пак гафар
Умар ибн Хаттаба нянрихъ парталар дегишардай ва шегьердиз сейрдиз экъечlдай, инсанривай кlвалин-къан къайгъуйрикай хабар кьадай. Са сеферда ам нек маса гузвай дишегьлидин кlвалихъ фена. И вахтунда дишегьлиди вичин рушахъ галаз пакадин йикъан алвердин нек гьазурзавай.
Умараз дидеди рушаз лугьузвай гафарин ван къвезва: “Ша чна некlедиз яд ягъин”. Руша жаваб гузва: “Халифди и кар къадагъа авунва кьван!”. Дидеди аксивалзава: “Халифдиз и кардикай ихьтин геж вахтунда гьикl чир жеда?”. Руша адаз икl жаваб хгузва: “Эгер халифдиз аквазвачтlа, Аллагьдиз аквазва!”. И гафар Умаран рикlиз акьван хуш хьана хьи, ада вичин хва Асим и рушал эвленмишна.
Амавитрин авай-авачир са адалатлу халиф Умар ибн Абдулазиз дидедин патай абурун хтул жезва.
Гьазурайди — Куругъли Ферзалиев
