Кьурагьрин 1-нумрадин юкьван школадин -110 йис

ЯхцIурни цIуд йисалай виниз девирда зи уьмуьр Кьурагьрин 1-нумрадин школа­дихъ галаз сих алакъада ава. Алатай асирдин 70-йисуз заз сифте яз и школада кIелун кьисмет хьана. Анай зун жуван кIе­лунар давамариз фена. Гуьгъуьнлай, газетдин жавабдар работник яз, за и школадин ва муаллимрин баркаллу кIвалах­рикай тарифдин макъалаяр кхьена. А вахтара школадин кьиле хьайи ва жуваз тарсар гайи муаллимар тир Къурбанов Ме­гьа­медэмин АбдулнатIифовича ва Гьалимат Жалаловна Рамазановади газетдиз таъсирлу макъалаяр кхьин патал заз гьар са карда куьмекар  гудай.

Ингье эхиримжи къанни цIуд йисалай виниз девирда за хайи школадин гьакь­ван хъсан коллективдин арада зегьмет чIугвазва, акьалтзавай несил патал жу­ван чирвилерни къуватар жумартвилелди серфзава. Ихьтин коллективдин арада кIва­лахун, иллаки акьалтзавай несилдиз чирвилер ва тербия гун за жуван чIехи бахт яз гьисабзава.

Алай кIелунин йисуз чи школади вичин 110 йис тамам хьун къейд­да — са асирдилай гзаф вахт. И йисара шко­­ладай уьмуьрдин чIехи рекьиз гзаф жегьилри камар къачуна. ЦIудралди жегьилар  къизилдин ва гимишдин медалриз лайихлу хьана. Абурун жергеда ­жуьреба-жуьре йисара школа акьалтIарай ва гележегда кIелунар вузра давамарай ­Муслимова ­Раисат, Гьасанов Гьасан, Исакьов­ Исакь, Маллаева Альбина, Баба­ев Имам, Мисриев Фарид ва хейлин маса гадаяр ва­ рушар ава. Къе чи школадин педкол­лективди абурун баркаллу крарал дамахзава.

Илимдин чIехи кукIушриз хкаж хьайи чи выпускникрин кьадарни тIимил туш. Инал абурун баркаллу тIварар кьун кутуг­нава. Назаралиев Мегьамед-Шафи, Оружев Идрис, Саидов Тажидин, гьакI хейлин­ масабурни республикада, гьакI адалай къецени машгьур хьанва. Илимдин рекье чIехи тIварар къачунвай абур чи школадин­ дамах я. Хейлин жегьилри чпин уьмуьр Ватандин сергьятар хуьниз бахшнава.

Эхиримжи цIуд йисалай виниз девирда школадин кьиле гьа и мектебда физикадин муаллим яз кIвалахай Мисриев Гьамид муаллим ава. Адан алахъунар себеб яз, ина чпихъ вири рекьерай бажарагъ авай муаллимрин хъсан коллективни арадал атанва лагьайтIа, зун ягъалмиш туш.

Къе зи къаршидал акьалтзавай несилдиз чирвилер ва тербия гунин карда галатун тийижиз зегьмет чIугвазвай ва гьакI и рекьяй лайихлу тIварар къачунвай муаллимар хьун дуьшуьшдин кар туш.

Винидихъ за Рамазанова Гьалимат Жалаловнадин (рагьмет хьуй вичиз) тIвар кьунай. Мектебдиз сифте камар къачурдалай инихъ уьмуьрдин эхиримжи йи­къал­ди ада школадихъ галаз алакъа хвена.  Математикадай адан чирвилерин дережадикай рахун, заз чиз, артухан кар я. Гьа­кьван вичи хкягъай пешедиз вафалу хьайи адан къамат къе чна, ада тарс гайи аялри, еке гьуьрметдивди рикIел хкизва. Ингье, саки яхцIур йисав агакьна, адан руш Маринади багъри школада математикадин муаллим яз зегьмет чIугвазва, дидедин рехъ давамарзава. Завай, белки, Марина муаллимдин зегьметдиз лазим тир къимет гуз жедач жеди. И кIвалах чаз ада тарс гузвай аялрин чирвилерин дережадай ачухдаказ  аквазва. Адан рикIин михьивили, чинин ачухвили, масадахъ рикI куни, адаз вичивай жедай кьван гьуьрмет авуни ва дагъви дишегьлидин намусдиз хас маса лишанри адан уьмуьр гуьрчегарзава. Заз гележегдани Марина муаллимдихъ яргъал йисарин сагълам уьмуьр ва зегьметда агалкьунар хьана кIанзава.

А чIавуз райондин “Дагъдин булах” газетдин кьилин редактор яз, за Фейзул­лаева Гьуьруь муаллимдин чешнелу зегьметдикай  райондин,  гьакI  республикадин “Лезги газетдиз” макъалаяр кхьенай. Шад жедай кар ам я хьи, Гьуьруь­ муаллимдин чIехи вах, Фазията (рагьмет хьуй вичиз) ва чIехи кьве стхади — Юсу­фани Гьамида муаллимвилин пеше хкянава. Алатай кIе­лунин йис Гьуьруь муаллимдин уьмуьрда кьетIенди хьана. Адаз  “Да­гъустан Республикадин лайихлу муал­лим”­ лагьай баркаллу тIвар, гьакI маса чIе­хи шаба­гьар ганва. Хкянавай пешедиз гьакьван ва­фалу хьанвай Гьуьруь муаллимдихъ гележегдани еке агалкьунар хьун чи мурад я.

Вичин асул везифа кьиле тухунилай гъейри, эхиримжи цIуд йисалай виниз девирда чирвилеринни тербиядин рекьяй школадин директордин заместителвилин везифаярни кьиле тухузвай Амиргьамзаева Валентина Рамазановнадини муаллимвилин баркаллу пеше хкягъун дуь-шуьш­дин кар туш жеди. Жегьил муаллимриз гьар са карда куьмек гун, абурун фикир­ анжах аялрин чирвилерин дережа хкажунал желб авун Валентина Рамазановнади вичин кьилин везифа яз гьисабзава.

Саки къанни цIуд йисалай виниз девирда жувахъ галаз санал къуьн-къуьне туна аялриз чирвилер ва тербия гунин карда зегьмет чIугвазвай Рагьимханова Марият муаллимдизни афе­­рин къвезва. Са шумуд йис идалай вилик, ЧIехи Гъалибвилин суварин юкъуз райондин школьникринни жегьилрин патай Марият муаллимдиз гаф гайила, трибунадихъай ада, гъиле чарни къелем авачиз, кIватI хьанвай халкьдин фикир вичел желбдайвал, Ватандин ЧIе­хи дяведа душманди советрин халкьдиз авур кьван зулумрикай, душмандин бомбайрини женгинин техникади барбатIай шегьеррикайни хуьрерикай, дяведин иллаки эвел кьиляй бегьемвилелди яракьламиш тахьанвай аскерар душмандин хура уьтквемдаказ акъвазайдакай, аялри, дишегьлийри, гьатта яшлу итимрини далу пата фронт патал чIугур зегьметдикай вичин рахунра гьакьван ачухдаказ лагьанай. Тарихдин муаллим къанни цIувад йисалай виниз девирда ­акьалтзавай несилдин къуллугъда акъ­ваз­нава.

Къанни цIуд йисалай виниз девирда жувахъ галаз санал зегьмет чIугвазвай Фаталиева Зинаидадин ва Будаева Нафи­сат муаллимдин зегьметдин рехъни гьа и школада башламиш хьана. Алай вахтундани абур хкянавай пешедиз вафалу я. Гьам школадин педколлективдин, гьам чпи тарс гузвай аялрин патай абуру чIехи гьуьрмет къазанмишнава.

КIвалахдин юлдашриз за рикIин сидкьидай муаллимдин югъ мубаракзава. Къуй абурухъ чандин сагъвал, хушбахтлувал хьурай! Зи мурад абурун кьилел экуь рагъни михьи цав хьун я.

Абдула Семедов